Prysoorlog in aanvraag

Ek merk verlede week dat daar nou ’n prysoorlog vir jannas in die Poststraat-wandellaan aan die gang is. Jannas wat jy minder as twee weke gelede nog vir meer as ’n honderd dollar moes koop, is nou vir so min as N$44 beskikbaar.Een van die gelisensieerde handelaars in die deurloop het kom kla dat een van die straatverkopers regoor sy winkel ’n kraampie kom opslaan het en jannas teen feitlik die helfte van die gewone pryse verkoop. Die handelaar het vir my gesê dat dit onmoontlik is om jannas teen daardie pryse te verkoop, behalwe as dit gesteelde voorraad is.Die man met die gesteelde jannas berokken sy onderneming dan ook baie skade, want die publiek koop nou eerder van die gesteelde jannas as van sy wettige jannas, het hy gekla.Dit was nie ’n week later nie, toe bied die klaer met die lisensie en die wettige jannas dieselfde jannas vir nog minder as die “gesteelde” jannas te koop aan. Nou wonder ek waar my vriend die gelisensieerde handelaar skielik dié goedkoop jannas vandaan kry.Ek maak toe so ’n sommetjie in my kop en wonder toe, terwyl hy dieselfde jannas vir dubbel die prys aangebied het, wie nou eintlik vir wie ingeloop het.Nou wonder ’n mens ook of daar nie elke dag ’n prysoorlog oor ander items kan uitbreek nie.’n Lekker prysoorlog oor vleis sal nou baie welkom wees, want dit smaak my vir die gewone man op straat word dit nou haas onmoontlik om ordentlike vleis vir sy gesin te koop.Ekself is nie iemand wat van oorloë en moeilikheid hou nie, maar vir my part kan prysoorloë elke dag regdeur die jaar in Windhoek woed.Die munisipaliteit kan dan gerus groot kennisgewingsborde oral in die stad oprig wat aankondig waar die bloedigste prysoorlog van die dag gaan plaasvind.Restaurante, hotelle, diensstasies, kafees en openbare diensplekke kan diensoorloë aanknoop.Ek dink sulke verwoede oorloë is net wat Windhoek nodig het. So tussen die veldslae deur kan die gewone man op straat en die verbruiker dalk net ’n vreedsame en goeie bestaan begin maak. – 6 September 1995

Prysoorlog in aanvraag

Kommentaar

Republikein 2025-12-16

Meld asseblief aan om kommentaar te lewer

Prysoorlog in aanvraag

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.