Op die langpad saam met Antie Anna

Anna (Antie) Bostander (69) is nie ’n maklike tannie nie. Sy is een van die min vroue wat die huurmotorbedryf betree het en met groot deursettingsvermoë vir haar ’n pad na talle passasiers se harte in die suide van die land oopgery het. Meer as 30 jaar gelede het Antie Anna, vroualleen haar man begin staan in ’n bedryf waar dit ongekend was vir ’n vrou om passasiers – plaaslik en later ook oor lang afstande – na hul bestemmings te bring. Antie Anna het in 1990 op Lüderitz haar bestuurslisensie (groen boekie) ná ses probeerslae gekry. “Dit was op 19 Februarie in die jaar van ons onafhanklikwording en ek het R6.00 daarvoor betaal. Destyds het die verkeersbeamptes elke tweede week hier opgedaag en ek het onder die wakende oog van Errol van Staden by die vlakte agter die tronk op die hawedorp uitgepaseer,” onthou sy.Antie Anna begin in 1997 ’n plaaslike huurmotoronderneming, Bostander Transport, met ’n Mazda 323 and Mazda 626 in haar vloot. Sy registreer haar as ’n langafstand-huurmotorbestuurder in 2008 en skaf ’n Toyota Condor met sewe sitplekke vir die doel aan.“Dit het maar geknetter, want destyds het die manne geglo ’n vrou se plek is by die huis in die kombuis. Aan die begin het die ouens by die taxistaanplek summier geweier om passasiers in my voertuig te laai,” vertel sy. Dit het egter nie vir Antie Anna van stryk af gebring nie, maar haar net meer vasberade gemaak. Sy het begin om besprekings by haar huis te neem en haar kliënte by hul huise gaan oplaai. Na ’n jaar (2009) koop sy vir haar ’n sestien-sitplek-bussie sonder enige hulp van die bank en verander haar besigheid se naam na Bostander Shuttle and Tours. Sy was ook die eerste langafstand-huurmotoreienaar op Lüderitz wat ’n Toyota Quantum-bussie by haar vloot gevoeg het. Ná talle ongelukvrye jare op die pad en vele kilometers agter die rug, verdien Antie Anna ’n brief van erkenning vir haar sake- en ook bestuursvernuf van die MVA. Antie Anna se bestuursvernuf is darem nie verlore nie, want sy skuif nog af en toe agter die stuur in om ’n “trippie” vir ’n skool- of kerkgroep te doen. “Ek ontmoet mense en die langpad is terapeuties vir my. Ek het al diep gesprekke gevoer met baie jongmense wat voor by my sit terwyl ek op pad na hostels toe ry en kon heelwat van hulle positief motiveer. My man Paul is my grootste dryfkrag,” sê sy. Ek was onlangs bevoorreg om saam met Antie Anna vanaf Lüderitz na Windhoek te reis in haar vinnige rooi Polo. Terwyl die “old school”-musiek saggies in die agtergrond speel, gesels sy land en sand oor die ouetehuis op die hawedorp waar sy betrokke is en voor ek my o? kon uitvee, het ons veilig by my eindbestemming aangekom. – otis@nmh-hub.com.na* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Op die langpad saam met Antie Anna

Kommentaar

Republikein 2025-11-04

Meld asseblief aan om kommentaar te lewer

Op die langpad saam met Antie Anna

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.