Oor Charles Darwin, Curt von Francois en mitologie

“Dis nie die sterkste spesie wat oorleef, en ook nie die mees intelligente spesie nie. Dis die een wat die beste daarin slaag om aan te pas by die veranderende omgewing waarin hy hom bevind.”Hierdie bekende, immergroen aanhaling van Charles Darwin (1809–1882) kan ons hedendaagse mensdom ewe veel leer wat kultuur betref. Kultuur werk op dieselfde beginsel – dat dit moet aanpas om te oorleef, anders raak dit weg.Ons leef in ’n era waar die deursnee persoon ondanks al die beskikbare tegnologiese hulpbronne nie noodwendig bereid of in staat is om die nodige tyd te bestee om indieptestudies van menige onderwerpe aan te pak nie. Om nie eens te praat van sif deur die vloedgolf blatante misleidende propaganda wat deesdae klaarblyklik die inding is nie.Konsepte word gedistilleer tot wat die Amerikaners noem “bumper sticker politics” – ’n stereotipiese kort frase met dikwels die nuutste verdelende gonswoord wat gewone mense in die een of die ander emosiebelaaide rooi of blou kamp jaag. Veral wat die onheilige drie-eenheid godsdiens, sport en politiek betref.Net soos in Suid-Afrika en die VSA is die bietjie wat die gemiddelde Namibiër van sy land se “geskiedenis” weet, inderdaad eerder Namibiese “mitologie”. ’n Meestal oppervlakkige mengsel van uitgesoekte halwe waarhede wat kies om net die mooi kant, óf net die lelike kant, van enige spesifieke persoon of gebeurtenis voor te hou.Soos ons byvoorbeeld juis hierdie week weer met die verwydering van Curt von Francois se standbeeld sien.Is die agenda om te verwyder, gebaseer op gedokumenteerde geskiedenis? Of op “populêre mitologie”?Om toe te laat dat ons nasie oor standbeelde verdeeld raak, behoort nie eens te registreer op Namibiërs se radar van prioriteite te midde van November 2022 n.C. se werklike uitdagings nie.Terughunkering na “die goeie ou dae” is feitlik altyd ’n mite.Onse “Land of the Brave” en al sy unieke gemeenskappe moenie afwyk om toekomsgerig te bly nie. Die kultuur van versoening, eendrag in diversiteit en gesamentlike weerstandigheid teen ongure omstandighede is in die DNS van Namibiërs en moet sodanig gekoester word.Dit is tyd om te vernuwe en om vorentoe te kyk.Terloops, daai sogenaamde bekende aanhaling hier bo van Charles Darwin: Hy het dit nooit gesê óf geskryf nie.Dié alom nuttige aanhaling het inderdaad eers in die 1960’s ontstaan danksy ’n professor en produktiewe skrywer van teksboeke wat Darwin se werke opgesom en geparafraseer het.En nog ’n terloopsheid wat hieruit spruit: As jy die naam “Charles Darwin” hoor, skep dit heel waarskynlik in jou gemoed een van daai “bufferplakker-slagspreuke” van wie hy was en wat hy verteenwoordig.Weer eens, ’n geval van baie deeglik gedokumenteerde geskiedenis. Hy was sonder teëspraak ’n baie diep omie. Laat gaan gerus bietjie jou oog oor sy Wiki-lewe en -loopbaan.’n Verwante geleerde aanhaling om oor na te dink: “Uitsterwing is die reël. Oorlewing is die uitsondering.” – Carl Sagan.* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Oor Charles Darwin, Curt von Francois en mitologie

Kommentaar

Republikein 2026-03-24

Meld asseblief aan om kommentaar te lewer

Oor Charles Darwin, Curt von Francois en mitologie

Kommentaar

Republikein 2026-03-24

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.