Ons Taal

Wat beteken aweregs? Ek gebruik die woord as ek oor mense praat wat alewig agterstevoor is, wat nie wil hou by wat besluit is nie en immers skuins eenkant toe neuk.

Dalk is ek ook aweregs, wag net mooi tot al die planne mooi agtermekaar is vir aandete en begin dan terugkrabbel. Dis tyd vir ’n vleislose dis as manlief klaar maalvleis uitgehaal het vir saam met die pasta. Aweregs. Maar, wonder bo wonder, ek het pas die eintlike, letterlike betekenis van aweregs geleer. ’n Mens kan aweregs brei. Sien, Donderdagmiddae klets en brei ek nou. Ek moet van vooraf leer steke opsit en weer probeer onthou wat my standerd 1-juffrou my probeer leer het: insteek, omslaan, deurtrek, afhaal. Dan brei jy regs. So ’n mooi riffelpatroon. En ek dog as jy die wol omslaan en die stekie van ’n ander kant benader, brei jy links! Maar aikona, dan brei jy aweregs. Links brei is as jy die wol met jou linkerhand voer. Al is ek links, brei ek nou fluks regs: regs en aweregs. Ek leer dat ’n mens met daardie twee steke die wonderlikste patrone kan brei. Nou nie dat ek al daar is nie! Maar dis te heerlik as die stuk breiwerk so onder jou hande groei. En as jy ervare is, kan jy klets en brei tegelyk! Die woordeskat van brei is vir my te wonderlik. ’n Mens kan reksteek brei en koussteek. En wragties mossteek ook. Dis ’n nuwe wêreld wat ek aan die ontdek is. Brei is nie bry nie en ook nie braai nie. En met breipenne hoef jy nie boeke na te sien nie. Lekker. As julle weer sien, brei ek ’n trui met kabels.



Emma Kirchner

Vakgroep Afrikaans

Universiteit van Namibië

[email protected]



* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.