Ons taal

Jou lewe is soos seisoene. Seisoene van son wat oor jou skyn en seisoene van reën vir jou geleen. Jou seisoen is nie altyd maanskyn en rose nie, maar soms ’n woning van ’n doring.

Wees daai goudgeel sonneblom vol goue strale, eerder as ’n doringbos wat haak en steek om jou hart te breek. Wees daai onkruid wat nooit vergaan al is jou pyn soos ’n bitter aalwyn. Wees daai tolbos wat warrel deur al die geskarrel.

Kies ’n seisoen van vrede, eerder as vrees. Kies ’n seisoen van geluk en genees. Kies ’n seisoen waar die somerreën oor jou ween en die winterson jou groet en seën. Kies seisoene van kosmos en fynbos wat jou siel versier en ewig duur.

Vind die mooi in jou seisoen waar die mis voor die son verdwyn en die maanlig weer helder skyn. Vind die wolk met die silwer randjie en begin jou nuwe blaadjie.

Lag vir jou foute, glimlag deur jou trane, en hoop. Hoop vir troos soos ’n spierwit lelie, altyd daar in tye van swaarkry. Hoop vir liefde soos ’n rooi roos, altyd daar vir ’n hart so broos.

Soek die blommeparadys in tye van grys, die sonstraal in tye so vaal en die reënboog in die lug so hoog. Jou seisoen is tydelik soos ’n warrelwind wat weer rus vind.

Vul jou seisoen met die mooi van blomme en bloeisels getooi, maar wees bedag vir die swart wat om elke hoek en draai wag. Leef jou seisoen met oorgawe voordat die grou dit ewig begrawe.

Streef na ’n seisoen vol vrede en rede, en wag vir jou seisoen van gebede. . . en wanneer jou seisoen eindig, kan jy verkondig hoe die Heer jou seisoen beheer deur al jou seer.



Adéle van Niekerk

Vakgroep Afrikaans

Universiteit van Namibië

[email protected]