Ons taal

Ek het eenmaal ‘n boek gelees deur Robin Hobb en hoewel ek nie vat kon kry daaraan nie, het een aspek daarvan my bygebly: In hierdie verhaal het die name van die karakters ‘n direkte inspraak op hulle karakter, lot en aard gehad. Regoor die wêreld en veral in Afrika glo verskeie kulture dat die naam wat ouers kies ‘n invloed en mag het oor die persoonlikheid en die lotsbestemming van die kind. Vandag, 28 jaar gelede is ‘n babadogtertjie gebore, haar ouers het tot op daardie oomblik haar naam en geslag deeglik geheim gehou. 28 jaar gelede het ons wat ons my sussie gaan noem en die afgelope 28 jaar kon ons in haar sien wat haar naam beteken. Amé se naam oorspronklik afgelei van die voorletters van my oumagrootjie, Anna Maria Elisabeth. Die betekenis is afkomstig van die Franse aimée wat “geliefde” beteken en teruggevoer kan word na die Latynse verkleining van amat. Nie net is hierdie sussie van my geliefd nie, maar sy het ‘n intense liefde vir haar familie en geliefdes, ‘n vurige liefde wat so helder brand soos haar vlammende hare. Hierdie meisie met die sweetvoshare is die jongste in ons gesin, maar net soos klein Mei-Mei van Moomin, was haar gees egter nog nooit klein nie. Toe ons onlangs weer die geliefde Moomin nadertrek vir die kinders het dié klein rooikop Mei-Mei se naam my dadelik opgeval, want my dogtertjie noem my sus, Tannie Mé. En die ooreenkomste met hierdie karaker is opmerklik, dit is seker so dat sekere eienskappe met die rooikop-geen saamgaan, want beide Mei-Mei en Amé het ‘n baie sterk wil en ondeundheid daarmee saam.Die Chinese naam “Mei” beteken “skoonheid” of “blom” en uiterlik en innerlik sien ek daarin ook my liewe sussie: Sy is een van die mooiste mense wat ek ken en ten spyte van haar dapperheid en sterk uiterlike, is sy ook broos en sensitief soos die delikate blaartjies van ‘n rooi roos.Ek sien steeds my pa wat van die hospitaal terugkeer ná haar geboorte met die woorde: “Dis ‘n dogtertjie, en haar naam is Amé.” Of dit werklik is wat hy gesê het sal ek nie weet nie, al wat ek weet is dat die aanhoor van haar naam vir die eerste keer op hierdie dag 28 jaar gelede as ‘n kernherinnering by my vasgesteek het. Ek sal die koms van my sussie nooit vergeet nie. Gelukkige verjaarsdag my liewe sussie! Annika van der LindeVakgroep AfrikaansUniversiteit van Namibiëavanderlinde@unam.na

Ons taal

Kommentaar

Republikein 2025-08-28

Meld asseblief aan om kommentaar te lewer

Ons taal

Kommentaar

Republikein 2025-08-28

Meld asseblief aan om kommentaar te lewer

MELD AAN

Advertensie