Ons taal

Ek wens grootouers het ook beteken dat ’n mens sommer groot ouers word!

Natuurlik sal ek so wens omdat ek nie te groot is nie, maar dalk is dit al genoeg om net ’n grootouer te wees. Dis in der waarheid ’n genadegawe om ’n grootouer te word.

Ja, die vas of los skryf van woorde verander dikwels die woordbetekenis radikaal. Grootouers is nie meer ouers nie en ook nie regtig geen ouers nie. Hulle het nou mooi groot geword. Hulle is ook vir seker ouer. Daarom het hulle juis ’n spesiale ouer(s)funksie in die nuwe klein mensie se lewe. Om Ouma en Oupa te wees, is ’n spesiale gawe aan die grootouers. Maar veral is dit ’n spesiale gawe aan die jong klein mensie.

Ons sê immers so mooi in Namibië as iemand ouer word: “Jy word nou mooi groot”. Hierdie formulering is ’n eufemisme of dan versagting oor die ouderdom. Tog dink ek dit behoort veel meer waar as versagtend te wees. Agter die woord “groot”, lê eintlik veral wys en wysheid. Immers: Wysheid met die grysheid. Dis waarom grootouers so waardevol is vir kleinkinders. Hulle verskaf die wyse begeleiding en skep verwondering oor die wêreld omdat grootword hier ook groter rustigheid beteken.

Op die keper is grootouers eintlik ook groot ouers! Hulle word groots en sonder letterlike groei groot. ’n Kleinkind is in elk geval veel kleiner as enige lengte grootouer!

Geniet die groot wees en groots wees in jou kleinkinders se lewe. Bly groot in verwondering oor die gawe van lewe.



Dr. Nicoline Woest

Woordspoor K7

[email protected]