Ons taal

Jakkals en Wolf se stories bly nou al vir generasies deel van die onmisbare stories wat oor en oor gelees en oorvertel word. Ou Wolf laat hom so maklik om die bos lei. Ons kan sê hy is naïef, te goedgelowig of onoordeelkundig (veral wat betref sy keuse van bondgenoot). En die meneer wat immer vir Wolf ʼn lat pluk, hom laat les opsê of hom ʼn rat voor die oë draai, is die slinkse Jakkals wat dalk verander van haar, maar beslis nie van streke nie. Jakkals is skelm verby, altyd met ʼn sak vol planne. Hy is vernuftig. Hy is slim, ja, maar ook onderduims, dus slinks of slu. Ons kan sê hy is so slim soos die houtjie van die galg! Wanneer ons iemand só beskryf, bedoel ons dat sy slinksheid selfs grens aan misdadigheid, hy is in der waarheid geslepe. Nou waar kom dit vandaan? Die hout van die galg is destyds geskuur, of dan geslyp, deur die galg se tou wat gedurig daaroor gegly het. En as iets baie geslyp is, kan ons dit letterlik as geslepe beskryf. Die figuurlike betekenis haak daaraan. Ou Jakkals, geliefd of gehaat, is maar ʼn glibberige ou! Ek kan dink aan nog ʼn rits woorde wat ons kan gebruik vir hom. Hy is ʼn ander kalant, ʼn vabond, ʼn rampokker, ʼn skurk, ʼn booswig, ʼn opperste opportunis, ʼn lae lummel, ʼn berugte boelie, ʼn bedrewe bedrieër of sommer net ʼn ou bullebak. Noem hulle twee maar wat jy wil, maar hierdie makkers se verhale bly steeds ʼn heerlike bron van vermaak.Petronella F GenisVakgroep AfrikaansUniversiteit van Namibiëpfgenis@unam.naFacebook: Woordspoor* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Ons taal

Kommentaar

Republikein 2026-05-06

Meld asseblief aan om kommentaar te lewer

Ons taal

Kommentaar

Republikein 2026-05-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.