Ons taal

Vergelykings en metafore is die stapelvoedsel van enige skrywer. Dit skep ŉ direkte verbinding met lesers se verbeelding en het verbasende oortuigingskrag. ŉ Treffende metafoor of vergelyking kan ŉ leser onverhoeds betrap, nog voordat jy kan dink aan verset teen ŉ standpunt, sien jy die beeld in jou geestesoog en knik jou kop instemmend. Ek het onlangs juis so ŉ treffende vergelyking in een van Crito se LitNet-skryfsels raakgelees: “Om die publiek se reaksie op ŉ resensie te lees, is soos om die rekmerke onder die lycrakeurslyf van ons volk se siel te tel.” ŉ Lycrakeurslyf is enige voornemende bruid en postpartum-ma se boesemvriendin, die “kroekbroek” wat die rekmerke en rolletjies in toom hou. Die ongemak van die ou gebaleinde ryglyfie, korset of borstrok is effens verlig deur die moderne lycramateriaal. So lief as wat ŉ mens kan wees vir die kroekbroekie, so lieflik is dit om dit uiteindelik in die privaatheid van jou slaapkamer af te stroop. Om een of ander rede geld die konkrete praktyke nie vir die virtuele nie. Die mensdom se skynbare drang tot nudisme vind uiting aanlyn. Crito het “keurslyfie” slim gekies om juis te wys dat daar ŉ keurproses is in dit wat ons in die openbaar sal ontbloot. Maar die rekmerke wat aanlyn ontbloot word, is soos die ringe in ŉ boomstam: ŉ getuienis van ŉ siklus van uitdying en inkrimping in die psigologiese (en taalkundige) welstand van ŉ taalgemeenskap. Hoe vertoon die Afrikaanse taalgemeenskap in sy naakte parade aanlyn? Is dit ŉ verteenwoordigende beeld? Of is dit slegs ’n deel van die taalgemeenskap wat rekmerke wys en ŉ ander deel wat tel? Is die lycrakeurslyf ŉ dwangbaadjie teen spraakvryheid, ŉ kroekbroek wat die waarheid verberg of ŉ korset wat ruggraat, struktuur en deugdelikheid aan ŉ taalgemeenskap gee wat wil-wil uitmekaar val?Annika van der LindeVakgroep AfrikaansUniversiteit van Namibiëavanderlinde@unam.na* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Ons taal

Kommentaar

Republikein 2025-06-19

Meld asseblief aan om kommentaar te lewer

Ons taal

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie