Ons taal

Ek kan amper nie glo dat die wonderlik stimulerende leesgroep (Krit) reeds 45 jaar bestaan nie. En hét ons fees gevier tydens die laaste byeenkoms van 2026! Ons beplan weer die tradisionele Kerskrit. Ons soek gepaste tekste, ons beplan ’n spyskaart, stof ons blink klere af. Ons bak wraggies selfs Kerskoekies en koop vonkelwyn. Elsabe pak die reis met haar versameling Kersvaders aan, en Ingrid en Betteke vou origami-kraanvoëltjies wat die boodskap van vrede op ons Kerstafel uitstraal. Ons dink terug aan die wonderlike mense en boeke wat ons pad oor die afgelope 45 jaar gekruis het. George Weideman en Ia van Zyl wat alles begin het – wat ons geleer het om kritiese, stimulerende gesprekke rondom boeke te voer. Die ongeveer 300 tekste wat bespreek is oor meer as vier dekades, dien as bakens in ons leesreise. Verruimende tekste soos Griet skryf ’n sprokie, Agaat, Skepsel en Decima. Lekkerleesboeke uit die pen van Irma Joubert en Deon Meyer, maar ook uitdagende werke van Etienne van Heerden en Ingrid Winterbach. Wat ’n voorreg was dit om na Annika te luister as sy gedigte van byvoorbeeld Breyten Breytenbach en Lynthia Julius bespreek. Besoeke van Andre P. Brink, Antjie Krog en Marita van der Vyver tel verder onder die hoogtepunte, asook ons eie Namibiese skrywers soos Piet van Rooyen, Kobus Lombard en Hester Steenkamp. Vir die laaste Krit van 2026 was die hooffokus die vergestalting van Kerstyd in Afrika – in Afrikaans, Engels en Duits. Saam met Coenie de Villers is ons Kritwens: “Stille Nacht, unsere Weinachtsfest/ so many songs let’s sing the rest (...)/ Laat daar vrede heers vandag/ Laat die oorlog bietjie wag/ (...) Laat ons Hom in stilte vier/ Sonder bomme of mortier...”. Lank lewe die boek – en die lesers van boeke!Dr. Emma KirchnerVakgroep AfrikaansUniversiteit van Namibiëkirchner@afol.com.na* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Ons taal

Kommentaar

Republikein 2026-10-30

Meld asseblief aan om kommentaar te lewer

Ons taal

Kommentaar

Republikein 2026-10-30

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.