Ons taal

Ek sien onlangs ’n onderhoud wat iemand voer met die geniale Jacob Collier – komponis, sanger, speler van veelvuldige musiekinstrumente. 

Die einste Collier wat met sy eksentrieke flappende broekspante en bont hemde hele gehore kan lei om impromptu meerstemmig in harmonie saam te sing; wat ’n simfonieorkes met enkele aanwysings kan kry om grootse begeleiding saam met hom te produseer.

In die onderhoud betoog Collier dat ’n persoon op drie maniere emosie kan ervaar: in die hoof, in die hart en op die krop van jou maag. Hy vertel hoe daar soms ’n ervaring is – so groots en uit die bloute, dat mens nie eens tyd het om met jou verstand dit te beskryf of in jou hart te ervaar nie. Die eerste gewaarwording is hoendervleis. Hy noem dit ook die hoendervleiseffek. Dit is soos ’n refleks wat die verstand en die hart flink systap!

Hierdie onderhoud met die flambojante mannetjie het my laat nadink. . . ja, dit is waar dat sekere ervaringe jou roer – nog voordat jy daaroor kon nadink: as jy jou voordeur vroeg op ’n somersoggend na die ooste oopmaak en skielik nugter-wakker is omdat jy gegroet word deur die goue, amber, roes van ’n halleluja-sonsopkoms; as jy oorskakel na die klassieke musiekkanaal en die Adagio uit Mozart se bekende klarinetkonsert of Handel se Aankoms van die koningin van Skeba jou momenteel in jou spore laat vries; en dan onthou ek die onwillekeurige opwelling van trane toe ek as groen eerstejaar in die amfiteater op die kampus van Tukkies geluister het na Anna Neethling-Pohl se voordrag van NP van Wyk Louw se Vroegherfs in haar onmiskenbare, diep sjokoladestem: Die jaar word ryp in goue akkerblare, in wingerd wat verbruin, en witter lig wat daglank van die nuwe wind en klare son deurspoel word …

Pure hoendervleis.

Susan Alexander

Vakgroep Afrikaans

Universiteit van Namibië

[email protected]

* Beste lesers, keuring vir die ­publikasie van WhatsApp, briewe en alle ander lesers­bydraes berus by Republikein. Klagtes oor die diens van ­private besighede word eers aan die onder­neming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.