Ons taal

Dis nou al meer as ’n jaar sedert daardie dag wat Pa hierdie wêreld gegroet het, maar in my gedagtes gesels ons steeds lustig voort, veral wanneer daar lekker woord-dinge oor my pad kom wat ek weet Pa ook sou geniet het.Gisteraand het ek begin lees aan Max Lucado se boek van ’n fluistering in die stilte. Pa weet mos, hy is ’n Amerikaner, en hierdie boek dus ’n vertaling, maar absoluut meesterlik gedoen. Hoor net hier hoe begin die deel waarin hy sy waardering uitspreek: “’n Boek moet ’n tuin wees wat mens in jou hand kan hou. Met kleurvolle woord-blomblare. Sterk stamme. Wortels van waarheid. Blaai om en verander die seisoen. Lees ’n sin en geniet die rose. Tuinmaak is nie maklik nie, veral nie met woorde nie. Onkruid floreer en idees verwelk. Sommige paragrawe kort water, ander die snoeiskêr. Soms wonder jy of die oerwoud ooit getem sal kan word. Ek is innige dank verskuldig teenoor ’n paar mense wat hulle moue opgerol, hande in die grond gesteek en my gehelp het.” Vir sy redakteur sê hy: “Alhoewel ek inmekaar krimp as jy snoei, is jou snoeiwerk altyd in die kol.” “En laastens aan jou, die leser: uit die baie tuine wat jy het om te besoek, het jy hierdie een gekies. Ek voel geëerd. Ek hoop jy geniet jou besoek. Mag bekende dinge vir jou nuut word, en nuwes bekend. Vertoef so lank jy wil. As jy op ’n roos afkom wat jy graag wil hê, pluk dit gerus. As daar ’n paar is wat jy met ander wil deel, doen dit gerus. En wie weet? Adam het God in die tuin hoor praat; dalk gebeur dit met jou ook.”Tot later, my Pa!Petronella F GenisVakgroep Afrikaans Universiteit van Namibiëpfgenis@unam.na* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Ons taal

Kommentaar

Republikein 2026-09-18

Meld asseblief aan om kommentaar te lewer

Ons taal

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.