Ons taal

Raak jy gereeld deurmekaar met die fyn nuanses tussen persepsie en perspektief? Volgens die HAT, is persepsie “die waarneming van dinge deur middel van die sintuie”, en “die wyse waarop iemand iets verstaan”. Perspektief is weer “die verhouding waarin dinge gesien word”. Dis die stryd tussen hoe ons dink dinge is, teenoor hoe dit werklik vanuit verskillende hoeke lyk. 

Persepsie is daardie innerlike “drama-queen” wat dadelik oorneem. Dis die stemmetjie wat sweer jou skoonma kyk jou snaaks aan omdat sy jou kos haat, maar intussen het sy eintlik net haar bril by die huis vergeet. As daardie oulike ou in die gang nie vir jou waai nie, skree jou persepsie: “Ek is onsigbaar!” In die werklikheid het hy jou net nie raakgesien nie. Persepsie is jou aannamens, vrese, en die vinnige gevolgtrekkings wat die werklikheid vir jou inkleur, en dikwels vertroebel.

Perspektief is jou nugter vriend wat sê: “Kalmeer ’n bietjie, en kyk na die groter prentjie.” Wanneer persepsie skree dat die wêreld besig is om te vergaan, vra perspektief: “Is dit nie dalk net ’n slegte dag nie?” Jou alledaagse lewe word soveel makliker as jy leer om nie jou eerste persepsie as die absolute waarheid te aanvaar nie. Persepsie is die misleidende fluistering van jou innerlike self, die lens wat die wêreld vir jou kleur. Perspektief is die helder, onwrikbare blik wat jou uitnooi om verder te kyk, verby die geraas van jou emosies. 

Persepsie vra: “Wat as ek nie goed genoeg is nie, wat as dit alles skeefloop?” 

Perspektief antwoord: “Wat as jy reeds genoeg is, en skeefloop bloot beteken dat jy besig is om te leer?”

Adéle van Niekerk

Afrikaansonderwyseres

[email protected]

* Beste lesers, keuring vir die ­publikasie van WhatsApp, briewe en alle ander lesers­bydraes berus by Republikein. Klagtes oor die diens van ­private besighede word eers aan die onder­neming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.