Ons taal

Oor die duim geneem, ís die twee woorde vriendelik of onvriendelik, positief of negatief?

Die ooreenstemmende woord is “slae”. Dis die meervoud van slaan. Van slaan hou ek glad nie – miskien wel ’n gholfbal. Eintlik herinner slae vir my aan iets soos ’n pak slae. Allermins vriendelik of positief. 

Aan-slae klink op die oor af vriendelik. Neer-slae klink vir my na baie hard val. “Neer” kom immers van die Nederlandse neder wat laag is of ten minste ondertoe.

Alhoewel daar ’n groot verskeidenheid betekenisse deur die HAT aangedui word vir “aanslae” is die betekenis so konteksloos vir my dadelik Bybels – die aanslae van die bose. As ek praat van die aanslae van die lewe, is dit die teenslae van die lewe. Die aanslae van die lewe is nie vir my die aangename gebeure van die lewe nie, maar aanvalle. Net soos met die bose se aanslae wat beslis iets is wat ek verkieslik sal vermy. Die enkelvoudsvorm bring ook vir my weinig vreugdevolle assosiasies – die inkomstebelastingaanslag slaan graag waar jy nie ’n hou wou hê nie.

Van neerslag hou ek veel meer. In Namibië laat die woord my dadelik dink aan reënneerslae – wel reën wat neerval en opvallend vreugde bring. In hierdie Paastyd laat neerslag my aan ’n ander positiewe gebruik van die woord dink: God se liefde vind neerslag in die Woord waar ons lees van die kruisiging en opstanding van Christus. Neerslae is ’n woord wat ek graag vashou.

Dr. Nicoline Woest

Woordspoor K7

[email protected]

* Beste lesers, keuring vir die ­publikasie van WhatsApp, briewe en alle ander lesers­bydraes berus by Republikein. Klagtes oor die diens van ­private besighede word eers aan die onder­neming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.