Onderwys – Selfone in ons skole

Kommunikasietegnologie het die afgelope dekades teen ’n versnelde tempo ontwikkel. Selfone het in 1994 die eerste keer die lig in Namibië gesien. Vandaar het die ontwikkeling wêreldwyd geen keer geken nie; verskillende fabrikate, ’n groot verskeidenheid van modelle met ontsaglike moontlikhede. Kunsmatige intelligensie (KI/AI) wat die land in 2024 binnegekom het, het hierdie tipe van ontwikkeling op ’n onstuitbare pad geplaas. En, natuurlik het onderwys sy deure wawyd vir hierdie ontwikkeling oopgemaak.Met die wêreld onder die dreigement van Covid-19, het die meeste regerings die deure gesluit vir so lank as wat die pandemie voortgetier het. Ja, leerlinge moes tuisbly, maar onderrig moes voortgaan. Eksamens moes geskeduleer word en leerlinge moes geëvalueer word. Die nuwe kommunikasietegnologie was die antwoord. Maar, nou toon navorsing dat die wêreld hom misgis het met hierdie tegnologie; aanlyn onderrig was toe nie so ’n sukses nie. Die akademiese agterstande is nie uitgewis nie en die kloof tussen die bevoorregte en minderbevoorregte leerlinge het al hoe groter geword. Ná Covid het meer leerlinge toegang tot selfone en rekenaars gehad. Nou woed die diskoers oor die wysheid van selfone op ons skoolterreine en in die klaskamers. Die reaksies is uiteenlopend!’n Paar weke gelede het ek die insident verhaal van die skoolhoof teen wie ’n strafregtelike klag by die polisie gelê is, gearresteer is, deur die polisie aangehou is en agterna na ’n ander standplaas verplaas is. Sy oortreding; hy het ’n leerling verbied om met ’n selfoon die eksamenlokaal binne te gaan en het die apparaat in sy kantoor toegesluit. Wat is die hoofstandpunte vandag? In Nederland moet skole self oor die toelating van selfone besluit. In Frankryk heers ’n algehele verbod van selfone op skoolpersele vir die hele skooldag. Dit geld nie net in die klaskamers nie, maar ook tydens pouses en etenstye. In die VSA het ’n studie bevind ongeveer 90% van alle skole plaas beperkings op die gebruik en dra van selfone gedurende klastyd en oor die hele skooldag. In Engeland is dit die verantwoordelikheid van die onderwysowerhede om toe te sien dat selfone nie gedra, gesien of gebruik word nie. In Skotland het die skoolhoof die bevoegdheid om bepaalde toegewings te maak of om selfone algeheel te verbied. Wallis en Noord-Ierland beweeg in dieselfde rigting. In Namibië het Kanaal 7-opnames gewys op die positiewe en negatiewe aspekte van selfone op skoolpersele. ’n Realiteit wat ook hier ter sprake gekom het, is dat moderne tegnologie ’n realiteit is. Dit kan nie weggewens word nie! In Namibië verbied die Onderwyswet van 2020 die onvanpaste gebruik van selfone en ander elektroniese apparate. Die skoolhoofde is verplig om dit toe te pas. Suid-Afrika het ook so ’n gedesentraliseerde model. Die onderwysowerhede verwag van die liggame wat skole beheer om met toepaslike skoolbeleide vorendag te kom. Die vraag bly steeds of die toelating van selfone op skoolpersele ’n betekenisvolle bydrae kan lewer tot gehalte-onderwys. Die oorwoë mening is dat dit met toegewyde onderwysers en doeltreffende klasbestuur wel moontlik is. Maar, ons is nog nie daar nie. So, al wat oorbly is ’n algehele verbod. Wat ook al die geval, reëls rakende selfone op skoolpersele moet deeglik in die gedragskode vir leerlinge opgeneem word. Onderwysers, skoolleerlinge en ouers moet ook deeglik ingelig word. Wat my egter pla is of daar ruimte is vir die aanwending van selfone in een lesuur. Die onderwyser moet vinnig ’n opname maak van leerlingteenwoordig, refleksie doen oor die vorige dag se werk, vinnig ’n opname maak van die vorige dag se tuiswerk, die nuwe leerinhoude aanbied en nuwe opdragte oordra. Dan moet hy/sy nog tyd maak vir leerlingbetrokkenheid (learner centeredness). Die onderwysersunies het ’n oplossing,”Teachers teach and learners learn”. Daar is nie tyd vir selfone nie! – godfrey.kleinhans@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Onderwys – Selfone in ons skole

Kommentaar

Republikein 2026-10-15

Meld asseblief aan om kommentaar te lewer

Onderwys – Selfone in ons skole

Kommentaar

Republikein 2026-10-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.