Onderwys – Regte, geregtigheid en onderwys

Die uitspraak in die hofsaak wat onder andere gegaan het oor selfdegeslaghuwelike, het die kat behoorlik in die duiwehok losgelaat.

Uit politieke, godsdienstige en ander kringe het heelwat kommentaar gekom; soms bytend en aggressief. In sy sterk verklaring het die regerende partyverhoudings binne die LGBT (lesbian, gay, bi, en transgender)-gemeenskap as “immoral en indecent” geag. Hulle huldig die mening dat dit botsend is met die reg in die land. Die verkose lede van die party het nou die opdrag om die betrokke bepaling in die immigrasiewet (die eintlike doring in die vlees), in die parlement gewysig te kry. Die prokureur, van die eisers, is egter van mening die woorde in die wet kan moontlik gewysig word, maar dat die skending van die waardigheid van die betrokkenes nie deur eufenismes ongedaan gemaak kan word nie. In die lig van die erkenning en beskerming wat menseregte en maatskaplike geregtigheid in die land geniet, is dit vir my ’n reuse-anomalie. ’n Ander vraag wat by my opkom, is hoeveel tyd die antagoniste werklik aan nalees en navorsing oor die onderwerp bestee het.

In my soeke na groter duidelikheid het ek op ’n LMM-verhandeling, getiteld “Attitudes of the Namibian police towards lesbian and gay groups in Katutura” (2017) deur Monika-Michelle Mpuka afgekom. Die graad is aan die Universiteit van Pretoria verwerf. Die verhandeling gaan oor die geskiedenis van en onverdraagsaamheid teenoor lede van die LBGT-gemeenskap asook oor hul ervaringe. Die wenner van die Mnr. Gay Namibië-kompetisie is na sy terugkeer uit die RSA deur ’n groepie booswigte aangeval. Hy het onmiddellik daarna ’n klag by die Wanaheda-polisiekantoor in Katutura aanhangig gemaak. Op navraag by hierdie kantoor is hy meegedeel dat die dossier soek geraak het. Dit is die kernaspek waarop die verhandeling gebou is. In haar werk noem me. Mpuka dat sterk bewerings bestaan dat lede van die LGBT-gemeenskap wreed deur ander gevangenes in die selle aangeval word. Sy beweer ook dat daar weinig hieraan gedoen word. Indien hierdie optredes teen die LGBT-gemeenskap voor onafhanklikwording bestaan het, het dit na 1989 voortgeduur; optredes wat duidelik in stryd is met die gemenereg (common law) wat na 1989 steeds in die land van toepassing is. Verder is dit in stryd met internasionale reg en internasionale konvensies waarvan Namibië ’n mede-ondertekenaar is. Hierdie konvensies is spesifiek gerig op die beskerming van menseregte en bevordering van maatskaplike geregtigheid.

Maar, kom ons keer terug na onderwys wat die fokus van die rubriek is aangesien ek nie besig is om voorspraak te maak vir LGBT-praktyke nie. Die uitvoerende hoof van onderwys het nou die ander dag tereg aangevoer dat kinders nie op skool geleer word om lesbies en homoseksueel te wees nie. Maar, ons leerders moet ook leer elke mens is uniek, asook van die verskille tussen mense. Ons moet hulle daarvan bewus maak en dat daar slegs een stel menseregte in die land is wat geld vir almal, ongeag agtergrond, sosioëkonomiese status, geloof, geslag en kulturele agtergrond , Hulle moet ook leer dat aanvalle op leerders wat hul vereenselwig met die LBGT-gemeenskap verkeerd is en dat dit verdoem moet word. Miskien sal ons op hierdie wyse afknouery op skool ook hokslaan.

– [email protected]

* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.