Onderwys – Dienslewering

Dienslewering is seker die mees meer lettergrepige woord wat hoog op die gemeenskapsagenda voorkom, veral in ons buurland. Die burgers daar kla van stedelike en nasionale paaie wat nie in stand gehou word nie, swak sanitasiedienste, water- en elektrisiteitsvoorsiening en vullis wat nie verwyder word nie. Vriende vertel my dat my grootworddorp, Uitenhage, die tuindorp van die Oos-Kaap, in ’n “vullishoop” ontaard het. Die Katutura-staatshospitaal is ook voortdurend in die spervuur. ’n Paar maande gelede het ek navraag by die staatshospitaal en die ministeries van geslagsgelykheid en welsyn hier gedoen oor tienerswangerskappe. Die statistieke, soos opgeteken in die ministerie van onderwys se jaarlikse statistiekverslae, het net nie reg vir my geklink nie. Ek is verwys na kantore in Windhoek van die betrokke ministeries en selfs van e-posadresse voorsien. Akkurate inligting is belangrik sodat streke en skole ingeligte besluite kan neem en strategieë kan implementeer. Ek wag nou nog vir die inligting! ’n Paar weke gelede het ek navraag oor my en my vrou se personeelnommers by die plaaslike onderwyskantoor gedoen. Die vorige direkteur het my na die personeelafdeling verwys wat daarmee werk. Die klerk was baie behulpsaam maar kon dit nie opspoor nie en het my na die streekkantoor se argiewe vergesel. Hy is daar die leviete voorgelees dat dit nie die manier was om dit te doen nie. Ek is wel ingelig die versoek is ontvang en dat dit aandag geniet. Ek wag nou nog! Onlangs het ons president ’n groot deel van haar toespraak aan dienslewering gewy. Hier het sy gewaarsku dat swak prestasie en ondoeltreffendheid in die staatsdiens ernstige gevolge vir die oortreder kan hê. Sy het in dieselfde trant as die voormalige onderwysdirekteur, John Kondombo, gewaarsku:”Shape up or ship out.” Nou wat is dienslewering? Dis die proses waardeur ’n organisasie nodige dienste aan sy klante/kliënte lewer. As ’n reël is dit ’n behoefte waarin die klant/kliënt nie self kan voorsien nie. ’n Mens is byvoorbeeld nie verplig om die hulp van ’n prokureur vir elke strafregtelike en/of siviele saak waarin hy of sy betrokke raak, te bekom nie, maar omdat die meeste mense oor weinig regskennis en vaardighede beskik, is dit wel belangrik om die hulp van ’n regsgeleerde in derglike omstandighede te bekom. Dienslewering rus op die volgende pilare; betroubaarheid, responsiwiteit, sekerheid en empatie. ’n Verdere eienskap is tasbaarheid of waarneembaarheid. Hierdie pragtige eienskappe beteken egter niks sonder ’n organisasie se visie en missie nie; natuurlik ondersteun deur waardes, norme en beleidsrigtings. En natuurlik moet die individue oor die nodige professionaliteit, gedrewendheid en goeie kommunikasievaardighede beskik. Hy of sy moet ook beskik oor ’n sin vir detail, probleemoplossing en goed vertroud wees met die organisasie en sy produkte. Wat beteken hierdie goed nou eintlik vir onderwys? Nou die ander dag het die minister van onderwys gerapporteer dat ’n groot gros graad 3-leerders nie beskik oor die leesvaardighede wat van dié ouderdomsgroep verwag word nie. Die stadige pas waarteen leerders deur die stelsel beweeg, is net so kommerwekkend. Ja, bepaalde leerdereienskappe en ouerbetrokkenheid het veel te make hiermee. Maar, kom ons fokus op die diensverskaffer, die onderwyser. Elke onderwyser moet daarna streef om ’n hoë skool- en klaskamerteenwoordigheidskoers te handhaaf. Elke onderwyser behoort sy/haar jaarwerk deeglik te beplan om elke dag goed voorbereid by die skool op te daag. Vir hierdie doel moet die voorbereiding- en verslagboek goed bygehou word. Elke les moet met die nodige vertroue, selfversekering en empatie aangebied word. Klaskamerpraktyke vereis dat geleentheid gebied moet word vir leerlingdeelname en onderwysers moet responsief wees vir die behoeftes van die leerders. Maar weer eens, hierdie goed bly mooi intensies sonder die ondersteuning van die skoolleierskap; dit is hier waar onderrigleiers na vore moet tree. Die skoolbestuur moet voortdurend monitor, evalueer, lei, oplei en ondersteuning verskaf. Die diensleweringketting begin by streekkantore wat implementeer, monitor, evalueer en ondersteun en die ministerie wat beleide voorskryf en die nodige fondse voorsien. – godfrey.kleinhans@gmail.com* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Onderwys – Dienslewering

Kommentaar

Republikein 2025-11-04

Meld asseblief aan om kommentaar te lewer

Onderwys – Dienslewering

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.