’n Sagte antwoord?

Toe kleinseun so twee jaar oud was, het hy ’n onverwagte botsing met ’n Simba chips-opblaasleeu gehad. Ná hy vir my die storie met groot gebaar vertel het, eindig hy só: “Oe Ouma, ek bang hom!”Ek verstaan hierdie “bang hom” so goed! Al is ons ouer as twee, bly daar maar altyd dinge waarvoor ons regtig in hierdie lewe bang is. Ervarings soos siekte, geldelike verlies, ouderdom, eensaamheid – dit is alles lewenssituasies waarvoor die meeste mense op een of ander tyd regtig bang is.Daar is natuurlik ook individuele bangmaakgoed. Dit is gewoonlik iets wat by ’n spesifieke persoon groot vrees skep, maar wat meestal deur ander mense verwerp word met: “Ag man, moenie laf wees nie – dis niks om voor bang te wees nie. Ruk jou reg!”’n Goeie voorbeeld hiervan is skoonsus Mareta se vrees vir weerlig. Sy het in die Boland grootgeword, maar is toe (toevallig) met ’n Pretorianer getroud – ’n plek wat bekend is daarvoor dat dit erg weerlig-befoeterd is. Sodra die donker wolke opsteek en die lugruim begin flikker, klim Mareta in haar bed en trek digte komberse oor haar kop. Dit is ’n vrees wat dikwels vir ander mense onlogies voorkom, maar die persoon wat dit beleef, glo sonder twyfel dat dit vir hom/haar lewensbedreigend is.Ek het ook so ’n vrees – die vrees vir konfrontasie. Ek hou nie van rusie en onaangename argumente nie en ek kan nie sarkastiese opmerkings, woordewisselinge of vuiste wat geswaai word, hanteer nie. Enige “baklei-gesindheid” maak my bang en aktiveer my vlugmeganisme. Wanneer daar rusies in die lug is, hol ek – net soos skoonsus – kamer toe en trek die komberse oor my kop.Ek het heelwat hieroor opgelees in ’n poging om my vrees te oorwin. Volgens “kenners” is hierdie vlugmeganisme tipies ’n gebrekkige poging tot selfstandigheid. ’n Volwasse mens behoort in staat te wees om sulke konfrontasies sinvol te hanteer. En behoort te besef dat menslike verhoudings (in werksopset, huislike omgewings en selfs toevallige konflikte soos die man op straat wat jy per ongeluk met jou handsak gestamp het) noodwendig ’n wye spektrum van onderonsies kan hê wat die volwasse persoon behoort te kan hanteer. Ek verstaan die beginsel goed, maar vra tog – wat van Spreuke 15:1 “’n Sagte antwoord laat die woede bedaar, maar ’n skerp woord laat die nyd opvlam.” En Salomo was mos sekerlik bekend as ’n wyse man – ten spyte van sy 700 vrouens!Nou ja, ek aanvaar dat my vrees vir kopstamp onlogies, onsinnig en onvolwasse is en ek probeer dikwels om dit te oorwin. So het ek ’n ervaring gehad waartydens ek seker was dat ek vir eens en vir altyd my vrees gaan oorwin.Ek was vinnig op pad huis toe ná werk in Manlief se nuwe blou Mercedes (slegs 200 km op die klok). Ek was soos gewoonlik haastig en besluit om kortpad deur ’n onbeboude gebied te ry. Toe ek vinnig om ’n draai gaan, was daar skielik bome dwars oor die pad en mense wat besig was om takke rond te sleep.Hier oorwin ek toe my vrees. Ek spring woedend uit die motor wat met skreeuende bande tot stilstand gekom het en gil luidrugtig: “Wat de duiwel doen julle?”Die een omie naaste aan my se sagte antwoord was: “Ons probeer net om die bome wat oor die pad geval het vir jou weg te sleep.” Nou ja. . . Hierdie ervaring het natuurlik my vrees vir konfrontasie versterk. Maar met die ouderdom kom wysheid. Mettertyd het ek geleer dat “’n sagte antwoord” meeste struwelinge kan voorkom. So lees ek toe ook die volgende wysheid, geformuleer deur ’n ou skeepskaptein met jare se see-ervaring: “Moenie bang wees vir die storm nie, leer eerder hoe om jou skip te stuur.”– Gasskrywer hugonamibia@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

’n Sagte antwoord?

Kommentaar

Republikein 2026-11-02

Meld asseblief aan om kommentaar te lewer

’n Sagte antwoord?

Kommentaar

Republikein 2026-11-02

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.