Mini-oorlog op my balkonnetjie

Moeder Natuur het haar winterjas sommer so in die loop in Kaapstad se woeste wind uitgepluk, eenkant gesmyt en halfnaak haar wulpse heupe geswaai.Sy het haar lente soetkys in die hand; nie ’n Chinatown-wielietjies-soetkys nie; nee, die oorspronklike reënboog-kleur soetkys wat haar Maker aan haar toevertrou het. Sy’s letterlik gesandaal en gespoor vir haar lenteprojek.Die son flankeer skaamteloos met berg, boom en bos. Sy speel “peek-a-boo” agter wolke en nooi haarself in met ’n warm lek teen my boekrak.Voorwaar ’n mooie Maandag as my gesteelde hotnotsvy my met ’n soet-pienk blom begroet.En soos ek oorskiet-watertjies uitdeel, hoor ek in my geestesoor gesprekke. Of is dit my kinderlike oor wat na feëtjieland verlang – ’n tydelike wegbreek van die knellende ekonomie en politiek?Nee wragtig, daar is ’n onderonsie tussen my “garden art”.Die nuwe tuinkabouter met sy rooi pet soek skoor met die ou kabouter met sy gebleikte blou pet.“Lag maar nuweling,” dink die ou kabouter, “al wat ek weet is dat die son juig vir ’n nuwe afknouding – jou jeugdigheid en kleur is gou-gou geskiedenis!”Die metaal-sonneblom se dae is ook getel, plek-plek opgeroes. Haar eens guitige geel nou kunsbotter-geel. Maar sy is van geaardheid nederig en swyg, want as namaaksel kon sy nooit haar kop na die son draai nie.“Shut up!” skree windklokkies. “Ek het dae van droewige hang as die wind elders sit en suip of net luilekker lê.”Sy swaai kokketerig en sing op die maat van die lente bries. Dié is haar seisoen!Dryfhout en verstokte wiere kyk droog na mekaar. Dryfhout vra: “Wat soek ons hoeka tussen die mensgemaakte goeters; ons is wragtig die enigste egte kuns uit Moeder Natuur se buik.”“Askies tog,” skree skulpies en spoelklip.“Ons is nét so oorspronklike skatte uit die diepe oseaan.”Die Zim-kameelperd, ladybug, gecko en skoenlappers skree in een stem: “Voeshêk, julle eenvoudige goetertjies; weet julle hoeveel ure van harde werk en konsentrasie is nodig om ons met fyn kraletjies te skep? Ons spog in menigte tuine – armes, rykes, selfs luukse gastehuise. Spreek dít nie van hoë waarde nie?”“Uthule!” skree die Zoeloe-slypklipbeeldjie.“Ken julle my geskiedenis? Die slag van Bloedrivier? Ek moet eintlik PRINS-status hier kry.”Die Boesman-beeldjie sug met sy frommelgesig. “O, wee! Daar gaan ons alweer – wragtig politiek in die tuin ook! – dié is die vrede paradys van ons ouvrou. Het julle agtergekom dat haar eensaamheid haar niks pla nie. “Elke môre kom sy met daai woeste slaaphare uit om ons te groet. Sy praat moederlik met haar plantjies.”“Het julle die bye en voëls se opgewondenheid vir ’n nuwe dag raakgesien?“Los julle stront NOU! Ek as woestynklong ken die harde pad en droogtes van die lewe, maar glo aan dankbaarheid.”Sandroosklip maak haar keel in ’n growwe stem skoon.“Terloops, ek is ook eg uit die Namibwoestyn; madam het my so belangrik geag dat sy my oor die grens gesmokkel het. Nogal toegerol in daai massiewe panties. Ek kan óók op PRINSES-status aandring. Maar nee, ek voel geëerd vir my immigrasie.”In die balkonnetjie se hoek staan stiefkind-kompos in ’n emmer van Santorini-blou. Sy brom onderlangs“Julle beter julle bekke hou! Ek is die goud in tuingrond, voedsel vir erdwurms. Ek weet hoeka nie wat dink merrim om elke skil en eierdop in my te gooi nie, ek ruik al soos ’n tombo-emmer. “As ek durf op staking gaan, sal pietersielie, grasuitjies en soetrissies letterlik in ’n aanpas-klaskamer beland weens stadige groei; ek is die volwaardige tuinkaptein!” Die lentewind swiep saggies soos ’n wiegielied om die opstandiges tot kalmte te bring.Die tuinoorlog raak wapenloos as Koningin Lente haar soetkys oopmaak om daaglikse inspuitings vir plante toe te dien.Miesies skink haar Kloof-koffietjie en sing “Oh happy day” op vals note. Laat daar vrede wees en daar was soetkyse vol vrede.Laat daar seisoene wees en daar was ’n flambojante lente.– Gasskrywermachab1964@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf.

Mini-oorlog op my balkonnetjie

Kommentaar

Republikein 2026-10-20

Meld asseblief aan om kommentaar te lewer

Mini-oorlog op my balkonnetjie

Kommentaar

Republikein 2026-10-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.