Medisyne moet tred hou met evolusie

Het jy geweet dat mikro-organismes soos bakterieë, virusse en swamme weerstand opbou teen medikasie wat dit voorheen doeltreffend teëgewerk het?Dit veroorsaak dat infeksies soos longontsteking of tuberkulose moeiliker word om te behandel en in sommige gevalle nie behandel kan word nie.Antimikrobiese weerstand (AMR) neem vinnig toe en kenners meen dit word ’n wêreldwye gesondheidskrisis.Volgens die Wêreldgesondheidsorganisasie (WHO) veroorsaak AMR jaarliks reeds meer as 1,27 miljoen sterftes en sonder dringende optrede kan dit teen 2050 tien miljoen sterftes per jaar veroorsaak.Die wêreld se grootkoppe het dié kwessie vandeesmaand by die Verenigde Nasies se Algemene Vergadering bespreek. Maniere is bespreek om hierdie krisis aan te pak en gesondheidsorgstelsels te versterk. Volgens navorsing is een van die hoofoorsake van AMR die oorbenutting en misbruik van antibiotika by mense en diere. Dokters skryf dikwels antibiotika voor vir virale infeksies, wat geen effek het nie.Dieselfde geld vir die gebruik van antibiotika in landbou, waar dit gebruik word om vinniger groei by diere aan te moedig. Hierdie oorbenutting veroorsaak dat weerstandbiedende bakterieë oorleef en versprei, wat uiteindelik ons metodes van behandeling ondermyn.Alhoewel lande soos die Verenigde State van Amerika en Europese nasies reeds streng wette oor antibiotikagebruik in landbou ingestel het, moet daar nog baie gedoen word om die verspreiding van weerstandbiedende mikrobes te stuit.Volgens die kenners kan AMR met ’n omvattende benadering beveg word. Mense moet ingelig word oor die korrekte gebruik van antibiotika, en gesondheidsorgverskaffers moet meer verantwoordelik wees wanneer hulle antibiotika voorskryf.Dit is ook noodsaaklik dat regerings strenger regulasies toepas en monitor hoe antibiotika in beide menslike gesondheid en landbou gebruik word.Terselfdertyd moet daar in navorsing belê word om nuwe antibiotika en alternatiewe behandelings te ontwikkel, aangesien baie farmaseutiese maatskappye nie meer in antibiotikanavorsing belangstel nie weens die laer winsgewendheid wat daaraan gekoppel word.Die wêreld verander vinnig en dit is vreesaanjaend om te sien hoe vinnig weerstandbiedende mikrobes ontwikkel. Is dit ’n moontlikheid dat ons, ondanks die geweldige mediese vooruitgang wat wêreldwyd gesien word, dalk nie vinnig genoeg beweeg om tred te hou met die evolusie van hierdie bedreiging nie?Dit wil blyk dat ons dit eenvoudig nie kan bekostig om stadiger as hierdie mikrobes te beweeg nie. Die ironie is dat die magtige mensdom bedreig word deur dié klein gediertes. – kristien@nmh-hub.com.na* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Medisyne moet tred hou met evolusie

Kommentaar

Republikein 2026-05-05

Meld asseblief aan om kommentaar te lewer

Medisyne moet tred hou met evolusie

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.