Leierskap vir leke – Die waarheid oor leiers
“Liewer ’n diamant met ’n fout as ’n klippie daarsonder.” – Confucius, Chinese filosoof
Daar is vele leiers wat beide gelief én gehaat is – dieselfde leiers wat die beste in hul aanhangers uitbring en ook die slegste in ander.
Steve Jobs, soos Elon Musk, word dikwels uitgelig as visioenêre idealiste aan die een kant, maar hardvogtige of ongeduldige base aan die ander kant. Ander leiers soos Winston Churchill was bemind vir sy onverskrokkenheid en retoriese talente, maar is gekritiseer vir sy omstrede sienings oor kolonialisme en sy misbruik van alkohol.
Die wêreld is vol diamante met vlekke en dit is ook goed, want geen leier is volmaak nie.
In ’n samelewing wat gekenmerk word deur onmiddellike bevrediging, gefragmenteerde kontak en onbeheersde vryheid van spraak (wat soms aan afknouery en persoonlikheidskending kan grens), bestaan dikwels die verwagting dat leiers eenvoudig so foutloos soos die hemel self moet wees.
Gegewe dat volmaakte mense nog nie op ons aardbol gevind is nie, is dit ’n onrealistiese verwagting. Daarom is dit nodig dat ons goeie leiers met sagter oë moet bejeën:
– Leiers is mense en mense maak oordeelsfoute. Ons moet aanvaar leiers beskik nie oor spesiale magte soos toekomsvisie of telepatie nie. Besluite wat nou gemaak word, word gemaak met die beste inligting beskikbaar. Wanneer kontekste of situasies egter verander, kan organisasies (en leiers) gedwing word om hul strategie heeltemal te heroorweeg.
– Om te verwag dat leiers volmaak moet wees, is onrealisties en onregverdig. Nie net is ons samelewing, en organisasies daarbinne, ingewikkeld nie; individue is nog ingewikkelder en onvoorspelbaar.
– Leiers het ook emosies. Hoewel logika en rasionaliteit as die alfa en die omega in die sakewêreld beskou word, kan moeilike besluite en intense druk leiers se geestelike en emosionele gesondheid beïnvloed. Dis onrealisties om te verwag dat leiers altyd kalm en beheers moet optree.
– Ons groei soos ons leer en ons leer soos ons groei. Leiers maak foute en hopelik leer hulle ook daaruit. Dit bied die geleentheid vir die leier, sy navolgers en die organisasie om te verbeter – en te groei.
– Opregtheid is belangriker as perfeksie. Dis belangriker dat leiers uit ’n posisie van egtheid (authenticity) lei en kan erken hulle is mense wat foute maak; eerder as om voor te gee dat hulle alles weet en altyd in beheer is.
Om vanuit die invalshoek te werk dat leiers óók net mense is, skep nie net geleenthede vir groei nie, dit skep ook moontlikhede vir samewerking. Goeie leiers gebruik hul eie tekortkominge as boustene om self te verbeter en hul ervarings aan hul navolgers oor te dra.
Leiers wat hul eie beperkings erken, besef spanwerk kan die gapings aanvul; en dat alle spanlede idees en oplossings kan bied ten gunste van groter sukses.
Outentieke leiers wat opreg erken hulle is nie perfek nie, bou vertroue en lojaliteit onder hul volgelinge. Inteendeel leiers wat eerlik is oor hul kwesbaarhede, betoon juis nederigheid en die vermoë om moeilike uitdagings te oorkom – hierdie is in werklikheid sterkpunte waarop voortgebou kan word. Leiers wat besef hulle het self baie om te leer, betoon ook dikwels meer empatie teenoor ander.
Dis maklik om saam met Confucius te stem – eerder ’n diamant met ’n foutlyn, as ’n klipkop in die trop.
* Annemarie Schullenbach is ’n navorsings-, besigheids- en bemarkingskonsultant met ’n meestersgraad in besigheidsleierskap en veranderingsbestuur van die Namibië Universiteit vir Wetenskap en Tegnologie. Sy het meer as 20 jaar se professionele ondervinding in die private en openbare sektor, in leierskap, strategie en navorsingsbepaalde belangstellingsvelde.
– [email protected]
* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die media-ombudsman.
Daar is vele leiers wat beide gelief én gehaat is – dieselfde leiers wat die beste in hul aanhangers uitbring en ook die slegste in ander.
Steve Jobs, soos Elon Musk, word dikwels uitgelig as visioenêre idealiste aan die een kant, maar hardvogtige of ongeduldige base aan die ander kant. Ander leiers soos Winston Churchill was bemind vir sy onverskrokkenheid en retoriese talente, maar is gekritiseer vir sy omstrede sienings oor kolonialisme en sy misbruik van alkohol.
Die wêreld is vol diamante met vlekke en dit is ook goed, want geen leier is volmaak nie.
In ’n samelewing wat gekenmerk word deur onmiddellike bevrediging, gefragmenteerde kontak en onbeheersde vryheid van spraak (wat soms aan afknouery en persoonlikheidskending kan grens), bestaan dikwels die verwagting dat leiers eenvoudig so foutloos soos die hemel self moet wees.
Gegewe dat volmaakte mense nog nie op ons aardbol gevind is nie, is dit ’n onrealistiese verwagting. Daarom is dit nodig dat ons goeie leiers met sagter oë moet bejeën:
– Leiers is mense en mense maak oordeelsfoute. Ons moet aanvaar leiers beskik nie oor spesiale magte soos toekomsvisie of telepatie nie. Besluite wat nou gemaak word, word gemaak met die beste inligting beskikbaar. Wanneer kontekste of situasies egter verander, kan organisasies (en leiers) gedwing word om hul strategie heeltemal te heroorweeg.
– Om te verwag dat leiers volmaak moet wees, is onrealisties en onregverdig. Nie net is ons samelewing, en organisasies daarbinne, ingewikkeld nie; individue is nog ingewikkelder en onvoorspelbaar.
– Leiers het ook emosies. Hoewel logika en rasionaliteit as die alfa en die omega in die sakewêreld beskou word, kan moeilike besluite en intense druk leiers se geestelike en emosionele gesondheid beïnvloed. Dis onrealisties om te verwag dat leiers altyd kalm en beheers moet optree.
– Ons groei soos ons leer en ons leer soos ons groei. Leiers maak foute en hopelik leer hulle ook daaruit. Dit bied die geleentheid vir die leier, sy navolgers en die organisasie om te verbeter – en te groei.
– Opregtheid is belangriker as perfeksie. Dis belangriker dat leiers uit ’n posisie van egtheid (authenticity) lei en kan erken hulle is mense wat foute maak; eerder as om voor te gee dat hulle alles weet en altyd in beheer is.
Om vanuit die invalshoek te werk dat leiers óók net mense is, skep nie net geleenthede vir groei nie, dit skep ook moontlikhede vir samewerking. Goeie leiers gebruik hul eie tekortkominge as boustene om self te verbeter en hul ervarings aan hul navolgers oor te dra.
Leiers wat hul eie beperkings erken, besef spanwerk kan die gapings aanvul; en dat alle spanlede idees en oplossings kan bied ten gunste van groter sukses.
Outentieke leiers wat opreg erken hulle is nie perfek nie, bou vertroue en lojaliteit onder hul volgelinge. Inteendeel leiers wat eerlik is oor hul kwesbaarhede, betoon juis nederigheid en die vermoë om moeilike uitdagings te oorkom – hierdie is in werklikheid sterkpunte waarop voortgebou kan word. Leiers wat besef hulle het self baie om te leer, betoon ook dikwels meer empatie teenoor ander.
Dis maklik om saam met Confucius te stem – eerder ’n diamant met ’n foutlyn, as ’n klipkop in die trop.
* Annemarie Schullenbach is ’n navorsings-, besigheids- en bemarkingskonsultant met ’n meestersgraad in besigheidsleierskap en veranderingsbestuur van die Namibië Universiteit vir Wetenskap en Tegnologie. Sy het meer as 20 jaar se professionele ondervinding in die private en openbare sektor, in leierskap, strategie en navorsingsbepaalde belangstellingsvelde.
– [email protected]
* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die media-ombudsman.
Kommentaar
Republikein
Geen kommentaar is op hierdie artikel gelaat nie