Laat die kindertjies na My toe kom

“Old McDonald had a farm, hie ha hie ha hô. . . “Ons ken almal die ligtelike preprimêre liedjie oor ’n liewe omie en sy plaasdiertjies.’n Salige stukkie paradys!Toe kom dot.kom en haar blitsige/bitsige trawante en die lewe is niks meer ligtelik nog minder na aan ’n rustige paradys. Nee, dit raak ’n nimmereindige maraton van geldmaak, titels en kragte meet met ander lande. ’n Politieke put van waansin.En die voorloper van “kragte-meet”, uittart, septer-swaai is toe ook ’n oom Donald . Maar hierdie een se eendjies is glad nie in ’n ry nie; hy is ’n mutasie van oom Adolf Hitler.’n Omie met geen geduld, geen aptyt vir vrede of ’n ander land wat hom “wen” nie. Hy MOET ten alle koste op die troon bly. Sy smaakbekers verkies die wrang smaak van buskruit en bloed. Oorlog en doodmaak/uitroei is ’n skoppelmaaispeletjie. En so is die kinders van die wêreld op hul knieë. Hulle vertrou niemand meer nie; van skoolhoof tot priester. Hulle beraadslaag en stig ’n Internasionale Kinderaksie (I.K.A), met ’n dringende “RESOLUSIE 2026” direk aan Ons Hemelse Meester se kantore. Hulle vra min. Net VREDE en liefde, want dit het oornag in Antarktika se ysgletsers beland. Hulle honger oorskry die krampe van ’n leë maag, ’n diep honger vir vrede en veiligheid.Binne 48 uur kry hulle terugvoering van die Hoof Engel, en dit lyk as volg: Bataljon” Liberandum” gaan onverwags toeslaan en alle politieke leiers en presidente ontvoer na Planeet “NullaReditus” vir ’n onbeperkte tydperk. Die rillerfigure soos Annabelle, Chucky, ensovoorts sal die magtige manne op hul knieë bring, ’n riller teistering om hul verstand en hart oop te kloof en te probeer herstel tot menslikheid.Terselfdertyd gaan alle kerkleiers na Planeet “Ubi Caritas” vir herprogrammering/rehabilitasie aangesien die politieke pes hulle in ’n ongoddelike web gespin het. Hulle program behoort korter te wees om terug te keer as een hervormde Christelike genootskap. Bevelvoerder “Justitia” en haar span werk onverpoosd onder direkte bevele van die Hoof Engel en die Hemelse Vader. Die aarde makeer ’n algehele herstel met die ongiere karakters uit die prentjie. Dit beteken alle kunsmatige voedsel gaan vernietig word. Alle skole sal hul eie landerye moet hê vir gesonde kos; dit sal deel raak van die nuwe skoolkurrikulum met leerlingbetrokkenheid. Verder gaan opvoeding drasties verander met GEEN aanlyn fasiliteite. TikTok, videospeletjies word opslag verban. Outydse speel in die son en grond sal deel van sielshervorming wees. Biblioteke gaan weer koning kraai; die reuk van boeke, die dissipline, die amper heilige stilte met net kind-en-boekverhouding, dit sal wees soos versterkwater deur hul are.Slegs Desember-skoolvakansies sal kinders met ouers wegbreek; ander skoolvakansies sal daar kampe op plase wees waar kinders met diere gaan werk, leer perdry, landerye besoek en leer oor die goue skakel van bye in ons ekosisteem. Geen harde kinderarbeid, slegs blootstelling met ligte take. Hierdie is ’n vyfjaarprogram om die jonger generasie en die ekosisteem te herstel; om weer normaal asem te haal as net die huidige bestaan. Geen geweld, geen vrese. Net vrugbare grond met lowergroen bome om sodoende ons osoonlaag te herstel.Die kanse is dat die politieke leiers hul toets met los hande gaan druip, waarna almal netjies permanent in die “Bermuda Triangle” soos nuttelose afval weggegooi gaan word.9-8-7-6-5-4-3-2-1. . . terug na die werklikheid.Dit was ’n wonderlike droom. Dit het geruik na amandelbloeisels, gesmaak na suiwer fonteinwater.Die tydelike droom word verpletter as oom Duiwel Donald sy laaste oorlogsbevel met ’n sadistiese grynslag gee.Dis skielik nag in daglig as jong bloed riviere vorm. Abba Vader, kan U hulle vergewe?– Gasskrywermachab1964@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Laat die kindertjies na My toe kom

Kommentaar

Republikein 2026-05-14

Meld asseblief aan om kommentaar te lewer

Laat die kindertjies na My toe kom

Kommentaar

Republikein 2026-05-14

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.