Laat die aap uit die m(k)ou

Ek onthou nog van die tyd lank gelede toe die munisipaliteit inspekteurs gehad het wat rondgegaan het om seker te maak dat munisipale werkers hul pligte behoorlik uitvoer en dat alle installasies en munisipale toerusting in goeie orde was. Die openbare dienslewering in daardie tyd was ook veel beter as vandag.Nou het ek gewonder of die munisipaliteit dit nie wil oorweeg om weer so ’n persoon aan te stel nie. Die eerste ding wat die nuwe inspekteur kan doen, is om na die vertrek, waar die stad se verkeersligte gereguleer word, te gaan en te kyk wat daarbinne aangaan.Ek dink ’n bobbejaan het per ongeluk deur een van die vensters ingekom en speel nou met die knoppies of skakelaartjies wat die verkeersligte reguleer, salig onbewus daarvan dat hy groot misnoeë by motoriste veroorsaak. Die inspekteur sal die publiek se dankbaarheid verdien as hy die bobbejaan daar uit die vertrek verwilder en die verkeersafdeling blameer.In werklikheid het die arme mense niks te doen met die sinchronisering van verkeersligte of die uitleg van paaie nie. Dit is die plig van heeltemal ’n ander departement.Nou wil ek darem net vir die inspekteur wat die bobbejaan daar uit daardie vertrek gaan verwyder, waarsku dat hy maar versigtig moet wees. Ek reken die dier is al vir ’n geruime tyd binne in die kamer vasgekeer.Die inspekteur kan dan sommer ook so paar draaie deur die middestad loop en kyk na die haglike toestand van die sypaadjies. Dat voetgangers nog nie hulle enkels of bene in een van die slaggate gebreek het nie, gaan my verstand te bowe.Chris vertel my in Japan is die mense so trots op hul stede dat hulle as vrywilligers in hul eie tyd help, sonder vergoeding, om die stede skoon te hou. Nou wonder ek wat die Japannese van ons dink wanneer hulle die eerste keer in Windhoek aankom en hulle sien die gemors wat in die strate rondgestrooi word.Hulle sê as ’n polisieman jou in Japan vang waar jy ’n stompie op straat gooi dit amper doodsake is. Die publiek self takel jou ook glo toe as hulle jou sien rommel strooi. Miskien kan ons by hulle ’n les leer deur die volgende ou wat jy sien rommel strooi, aan te spreek. Wees ook nou maar versigtig dat hy nie ’n mes uitpluk en jou so ’n bietjie in die ribbe kerf nie.Ek glo as die bobbejaan daar uit die kamer waar die verkeersligte gereguleer word, verwyder is, die sypaadjies herstel word en ons sorg self vir die netheid van ons omgewing, is dit al ’n groot stap op pad na die standaarde wat in Japan gehandhaaf word. – 27 Junie 1996

Laat die aap uit die m(k)ou

Kommentaar

Republikein 2026-08-12

Meld asseblief aan om kommentaar te lewer

Laat die aap uit die m(k)ou

Kommentaar

Republikein 2026-08-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.