Krieket is vir die hele nasie

Tielman van Lill – Namibië is steeds in sy baba-krieketskoene in vergelyking met Asië en die res van die wêreld.Karnataka, die provinsiale krieketspan van die deelstaat Karnataka in die suidweste van Indië, het onlangs die Richelieu Eagles vir vyf eendagwedstryde in die hoofstad besoek.Die talentvolle burgers van Karnataka met Bangalore as hoofstad, het die Namibiese senior manspan oorrompel deur drie van die vyf eendagwedstryde te wen wat by United in Windhoek gespeel is.“Wel, ons het drie wedstryde verloor en net twee gewen,” sal sommige Eagle-ondersteuners onder hul snorre mor. Maar ’n paar feite sal dalk die kollig op ons plaaslike talent en onbesonge plaaslike helde plaas.Karnataka met 191 791 vierkante kilometer het ’n totale bevolking van 61 130 704 miljoen, terwyl Namibië slegs ’n geskatte bevolking van 2 550 226 miljoen siele vir sy 825 615 km² het. Ja, Karnataka kan min of meer 4,3 keer in Namibië pas.Karnataka was nog altyd ’n broeikas vir kriekettalent. Oor die jare het Karnataka beroemde name opgelewer wat vir Indië se senior nasionale span gespeel het.Name wat by my opkom, is die kolwer Rahul Dravid (1996 tot 2012), die regterarmdraaier Anil Kumble (1990 tot 2008), die kolwer en paaltjiewagter Robin Uthappa (2006 tot 2015), die regterarm-snelbouler Javagal Srinath (1991 tot 2003), die kolwer en paaltjiewagter Kananur Lokesh (KL) Rahul (2014 tot nou), die kolwer Mayank Agarwal (2018 tot 2022) en die legendariese kolwer Bhagwat Chandrasekhar (1964 tot 1979).Karnataka spog met ’n geskatte 500 topkrieketklubs en na raming 1,5 miljoen krieketspelers om die klubs met hul eie gekommersialiseerde T20-kompetisie te voed. Namibië het slegs vyf premierliga-krieketklubs met 60 spelers om die nasionale span uit te kies.Met al die statistiek in gedagte, moet ons besef watter enorme kriekettalent ons in The Land of the Brave het. Ons moet die Eagles en hul pogings ondersteun. Namibië se krieket is net semi-professioneel. Die meeste van die spelers het steeds ’n werk om hul gesinne te onderhou.Dit beteken ná ’n voldag se werk, moet die speler steeds gaan oefen om vir Namibië gekies te word. Nie ’n maklike taak nie.Hoewel Krieket Namibië uiters goed vaar met sy Ashburton Mini Krieket-ontwikkelingsprogram, sal die tyd ons eers oor twee dekades of so leer of dié pogings suksesvol was.Krieket moet van voetsoolvlak af groei en dit sal tyd neem om die saadjie by meisies en seuns in laerskole te plant om die pragtige spel as hul eerste keuse-sport te beoefen.Die huidige Namibiese nasionale groep is Stephen Baard, Niko Davin, Michau du Preez, Jan Frylinck, Nicol Loftie-Eaton, Tangeni Lungameni, Bernard Scholtz, Ben Shikongo, Ruben Trumpelmann, Michael van Lingen, Picky Ya France, Karl Birkenstock, Gerhard Erasmus (kaptein), Zane Green, Divan la Cock, Lo-han Louwrens, JJ Smit (onderkaptein), Shaun Fouché en Handré Klazinga. Die jong talentvolle en belowende o.19-speler, Gerhard Janse van Rensburg, het ’n paar kanse teen Karnataka gehad, maar ons het baie meer juniors nodig om uit die geledere te kom.Uganda se Cranes is juis weer in Windhoek om die Eagles broodnodige oefening in ses wedstryde te gee. Hulle sal vier T20- en twee eendagwedstryde by United speel. As Namibiërs die Eagles kan ondersteun soos dit in Zimbabwe die geval is, sal Namibië met meer vuur speel.Krieket is vir die hele nasie, nie net vir ’n paar bevoorregtes nie. – tielman@republikein.com.na

Krieket is vir die hele nasie

Kommentaar

Republikein 2025-06-18

Meld asseblief aan om kommentaar te lewer

Krieket is vir die hele nasie

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie