Koffie, Kobe en pienksous

So jaar gelede is ek en my pa Spur toe vir die tjips, ribbetjies en pienksous. Ek waardeer nogal ’n stukkie Spur hoor!Spur was altyd een van daardie “one-size-fits-all”-plekke wat bekostigbaar is en wat ’n goeie opsie is as jy nie wil dink oor waar om te gaan eet nie. Dit is tog immers ’n familie-restaurant, geskik vir kinders met hulle klimrame en inkleurprente.Intussen is die Spur ook nie meer goedkoop nie (kom ek toe agter) en kinders verkies deesdae skerms in plaas van inkleurpotlode. In Vader Tyd se uurglas is verandering ’n deurlopende konstante.Nog ’n konstante is mense se relatiewe persepsies oor wat goedkoop en wat duur is. Ek moet soms my oë toeknyp om daardie ekstra paar rand vir ’n koppie koffie te betaal. Slowtown, byvoorbeeld, is vir my baie lekker en die pennies werd. Craft-bier is ’n ander storie. Daar is min dinge so hartseer soos ’n bier wat soos spanspek proe wanneer ’n goeie ou Tafel Lager ’n kwart van die prys kos.In Dubai skroom sommige siele nie om ongeveer N$800 vir ’n cappuccino te betaal nie. In die hoogste restaurant op aarde, in die Burj Khalifa, word die luukse Kopi Luwak Golden Cappuccino as een van die duurste koppies koffie ter wêreld bedien.Kopi Luwak is spesiaal en duur omdat dit op ’n baie unieke manier gemaak word. Die koffiebone word deur ’n Asiatiese muskeljaatkat geëet, deur sy spysverteringstelsel gefermenteer, en dan uit sy mis versamel, gewas en gerooster. Die koffie wat hierdie bone lewer, word dan met gestoomde kameelmelk bedien en versier met 24-karaat-eetbare goudvlokkies. Daar is jou N$800-koppie koffie! Ewe skielik is Slowtown spotgoedkoop.Daardie taai, soetsuur-ribbetjie waaraan ek so lekker geëet het in die Spur, laat ook maar jou beursie se oë water. Ek is bewus daarvan dat restaurante en koffiewinkels hulle pryse moet aanpas vir oorlewing weens inflasie, so ek kritiseer dit nie. Dit is wat dit is.Gelukkig kan ons nog Spur toe gaan en hoef ons nie vir Kobe-biefstuk te betaal nie. Die Japannese vleisindustrie seën mos die heelal met hierdie spogvleis teen. . . wag vir dit. . . ongeveer N$15 000 per kilogram. Dink net hoeveel gaan jy betaal as jy nog tjips en pienksous moet bysit!Die waarde van hierdie vleis lê in die marmereffek; daardie fyn vetspikkels binne-in die rooivleis wat dit so uitsonderlik sag en sappig maak. Daar word selfs gefluister dat hierdie gehalte bereik word deur die beeste individueel te masseer en hulle met bier te bederf.Ek het nog nie ’n Namibiër teëgekom wat soveel vir vleis betaal nie. Dalk wandel hulle tussen ons. Wie weet?Die hartverskeurende realiteit is dat Slowtown-koffie en Spur-ribbetjies net so ontoeganklik vir ’n groot demografie mense is soos wat die drolletjie-boon-koffie en Kobe-bief vir my is.In September 2023 het ’n ma in die Oos-Kaap haar kinders se lewens geneem voordat sy haarself gehang het. Met armoede so oorweldigend dat die dood ’n ligpunt in verterende hongersnood is, is ’n bakkie pap of ’n bottertoebroodjie nie ’n luuksheid nie, dit dra soveel meer waarde. Dit is ’n lewensaar.Dalk moet ons dit wat kos vir ons soms verteenwoordig heroorweeg en dit benader as die funksionaliteit wat dit is. Dit bied lewe en kan ons as mense nader aanmekaar bring. Dit hoef ons nie te verdeel nie. Goue koppies koffie en marmerbief verrot in die kunsmatigheid van hul eie status. “Waarde” is ’n sosiale konstruksie wat ons self geskep het; ’n gejaag na wind. En, Spur se pienksous. . . ’n voorreg!– Gasskrywergerhardusdavid@yahoo.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Koffie, Kobe en pienksous

Kommentaar

Republikein 2026-08-27

Meld asseblief aan om kommentaar te lewer

Koffie, Kobe en pienksous

Kommentaar

Republikein 2026-08-27

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.