Koebaai, kersiekleur en hallo, pastelgroen

Ek dink ons het altyd geweet dat die internet vir ons wye nagevolge sou bring, maar ek dink nie ons het voorspel hoe wyd dit sou wees nie.

Ek is nie seker dat ons selfs nou kan sien hoe groot die verandering is wat die internet vir ons meegebring het nie. Ek dink een ding waaraan ons nie eens gedink het om te dink nie is mode, maar tog is “microtrends” een van die uitputtendste dinge van die internet.

Hulle sê die belangstelling in “cherry red” het aansienlik gedaal. Ek kan dit goed glo aangesien dié skakering van rooi vir ’n maand lank orals op die internet teenwoordig was en ek nou naar daarvan kan raak.

Hulle sê pastelskakerings van groen gaan nou die índing wees en ek kan reeds nie wag vir dit om uit te kom nie. Ek voel al ’n naar kol op my maag.

Die waarheid is almal van ons pas nie in dieselfde uniform nie; ons liggame en leefstyle is anders. Terwyl dit wonderlik is dat ons nou meer blootgestel kan word aan sekere style wat ons dalk gemakliker en mooi sal laat voel, dien dit geen doel as jy die nuutste modegiere aan jou lyf gooi omdat almal anders dit doen nie.

Ons voorvaders is almal gedwing om dieselfde diervelle te dra, maar nou het ons die geleentheid om aan die wêreld te verkondig wie ons is sonder om ’n woord te sê en ons kan ’n bietjie meer selfvertroue hê in dieselfde klere. Wat ’n voorreg is mode nie, maar misbruik ons dit ook nie?

Bo en behalwe die impak wat die vinnige verandering van modegiere op die omgewing en jong kinders wat hul vingers byna af werk vir net-net genoeg geld om vir daardie aand brood te eet, kos dit ons in die lange duur ’n klein fortuintjie om elke maand of twee ’n hele nuwe klerekas aan te skaf.

As ek elke oggend dieselfde broek en hemp uit my kas kon ruk en nooit ’n probleem met die weer sou gehad het nie, het ek elke dag presies dieselfde gelyk. Dit vat dinkwerk om elke oggend te bepaal wat om te dra. As ek uiteindelik in my kop ’n uitrusting aanmekaar geflans het – net om te besef dat die hemp wat ek van plan was om aan te trek in die was is – kan jy my maar net so wel begrawe en jy kan my sommer sonder klere in die kis ook sit want my klere is mos in die was. Maak net seker julle hou die kis toe, ek dink nie dié wat my ken sal dit wil sien nie. As hulle wil, Here vergewe hulle want hulle weet nie wat hulle doen nie.

Daar sal maar nog vergifnis moet uitgedeel word wanneer ek besluit dit is nou tyd om meelsakke te begin dra. Ek het nou genoeg gehad van cherry red en pastelgroen met hierdie en daardie neklyn en een of ander soort mou met ’n snaakse naam.

En moet nie vir my sê ek lyk mooi nie, want ek voel ook nie mooi nie. Ek sal waarskynlik voel asof daar meer ruimte in my brein is omdat ek nie hoef te dink wat ek moet dra nie – ’n meelsak is mos ’n meelsak.

Ek sal nie verbaas wees as meelsakke binnekort in die mode is nie, want ek dink ons almal is nou moeg vir die verwagting dat elke dag ’n modeparade moet wees.

– [email protected]

* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.