Kan jy dans?

Dieter Ian Maree – Die vure is hoog, Brenda se stem laag en diep, ’n vroulike vrolikheid woed daar in die hoek terwyl iemand met ’n nuwe Samsung angstig voer soek vir die volgende status update – dit moet boeiend wees! Die gif begin trek, die girlie wat die slaaie skep toets hom met ’n houtlepel teen die marmerblad, daar langs die swembad word ’n paar Gladiator-sandale soos kettings losgeruk en hier op die grasperk laat val ’n paar skewe heupe ’n stukkie goud uit die vorige millenium sonder dat een van ons iets opmerk – ou kuns van ’n muurblommetjie! “. . . sit eers die glas neer, dan wys ek jou hoe doen ’n mens dit . . .” Hy plaas die glas op die staal tafel met ’n linkeroog wat instinktief die level vang voor hy huiwerig by die ontluikende bok-trap-boogie aansluit. Die jongspan staan verward nader, want pa het tot vandag toe nooit juis ’n liggaamsdeel op die maat van enige musiek beweeg nie behalwe die paar vingers wat ongeduldig op ’n kerkbank tik terwyl hy sukkel om tred met die orrelis te hou. Die manne wat braai pak hulle taak met verbeterde toewyding en konsentrasie aan, want die gif moet op ’n veilige afstand gehou word – wie wil nou juis herinner word aan ongemaklike stiltes en koue sweet terwyl Bryan Adams ongedeurd aangeploeter het? Tyd en musiek wag vir niemand nie. Die kake begin cha-cha, want die gaste wat nie dans nie (klanke uit die tagtigerjare ontsteek glo haar sinusse!), maar die woorde onthou, sing back-up vir Brenda terwyl ’n gout-hakskeen warm gevryf word en Vicks-vingers vinnig oor ’n paar droë lippe hardloop – jy moet darem presentable ook lyk voor jy dit waag om die “grasbaan” te betree. Ouderdom is nie ’n verskoning nie.Iewers by die derde of vierde liedjie besluit sussie se skoonpa ná vier glase whiskey en ’n uitgerekte gesprek met ’n aantreklike dame rondom die land se politiek (in Engels) dat hy uiteindelik genoeg vlam in hom het om nuwe dieptes te peil. How low can you go? Die ander dansers het die “op-help”-fase op ’n ritmiese en taktvolle wyse hanteer en net een seuntjie is beseer toe sy ma hom aan die oor gryp omdat die arme knaap nie sy lag kon onderdruk nie. Die vyfde glasie whiskey en ’n verdere gesprek in Engels het darem sy waardigheid tot ’n mate herstel. Soos hulle vir Spice Girls by die “gras-fees” betrek, word die name soos vuil wasgoed laat val. . . Funky Chicken, Tiekiedraai, the Cowboy of Robocop (in ’n stadium het sy met ’n stywe skouerbeweging probeer skiet en perdry) terwyl die jong getroude paartjie hulle onskuldige weergawe van die Running Man lewer. Die Apaché en verbeeldinglose Bart Simpson word gelukkig onderbreek deur ’n aankondiging dat daar hondemis op die gras is en ’n vriendelike versoekie om tog mooi te trap. Nou. . . afwaarts kyk, heupe losmaak en voor jy sywaarts beweeg, weer kyk of daar nie ’n bondeltjie iewers is nie, neusie in die lig en dan triomfantelik verder dans. Indien jy ’n hopie ontdek met die afwaartse blik, hand op die mond met ’n kermgeluid (uh-uh), heupies swaai, die danser langs jou op die skouer tik, neusie in die lig en. . . Die Samsung flits skielik – ons het tot vandag toe nog nie ’n naam vir dáái ene gevind nie! – Gasskrywerdietermaree@yahoo.co.uk* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Kan jy dans?

Kommentaar

Republikein 2026-09-17

Meld asseblief aan om kommentaar te lewer

Kan jy dans?

Kommentaar

Republikein 2026-09-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.