Kammaland te lekker!

Constant Smit – Net weer ’n ou briefie aan my geliefde tante oorkant die groot rivier om haar te vertel hoe dit deesdae hier in ons ou landjie gaan.Liefste tante,Hier het die laaste tyd net mooi niks verander nie. Dit gaan nog te heerlik hier. Of laat ek liewers sê vir sekere mense. Ons wat vir ons daaglikse brood moet werk, knetter maar om voort te gaan. Maar die ouens wat ’n joppie op ons belastingbetalers se rekening losgeslaan het, gaan net vooruit. Hulle jaag nog steeds die land vol in staatskarre, slaap te lekker in die beste hotelle en koop die pragtigste huise in Windhoek met my belastinggeld. Ons sal hulle maar verder uitlos, want hul lekkerkry-tyd is amper verby. Binnekort sit hulle almal met hul agterente op straat.Ja, my tante, en wat ’n mens die hartseerste maak, is dat hierdie nuwe mense wat ons land kom binneval het, nog nie eens vir ons ’n kleinhysie gegee het nie.Ek het amper uit my vel van blydskap gespring toe hulle aankondig dat hulle ’n piesangplantasie in die woestyn gaan aanlê. Ek wou nog my hele lewe lank ’n piesangplantasie in die woestyn sien. En kan tante tante dit voorstel hoe lekker ons aan die piesangs sou smul. En wat het hulle ons gegee? Net mooi niks. Miskien ’n bietjie meer woestyn in die sand.Hierdie inkommers uit Luanda, Lusaka, New York, Londen, Lubango en nog ander plekke waar daar weelde-hotelle is, is verskriklik slim. Hulle het ons landjie vierkantig op die wêreldkaart geplaas toe een van hierdie slimmes aangekondig het dat hulle jogurtbome in ons landjie gaan vestig en sommer die hele wêreld in strome jogurt gaan verander. Tante kan tante mos nou indink wat ’n beroering dit onder die wêreld se gesondheidsbewustes veroorsaak het. Ja, tante dit is die soort mense wat ons nou mee opgeskeep sit om die land aan die gang te hou.Tante sal my nou nie glo as ek tante van al die giere van hierdie slimmes vertel nie. Hulle is besig om hierdie plek in ’n paradys te omskep. Dit is mos amper weer verkiesingstyd en dan is dit mos tyd vir beloftes. Oral vertel hulle die mense dat hulle nie meer hul skuld hoef te betaal nie. Wat kan nou lekkerder op hierdie aarde wees as om alles verniet te kry. En jy moet mos luister na wat hierdie slim mense met die duur pakke en wat in slap motors ry en ’n taal praat wat niemand verstaan nie, te sê het. Dit moet seker hartverskeurend vir hierdie mense wees om deur ’n tolk met hul eie mense te praat. Of hulle dink seker dit is hul mense.Met ’n lied in ons hart het ons gehoor van hoe die petrol uit Usakos gaan vloei, elkeen ’n dak oor sy kop gaan kry, elkeen ’n joppie gaan hê, mielielande oor die lengte en breedte van die land golwend gaan staan om die hele wêreld se hongeres te voed en nog baie sulke dinge. En ons wag en ons wag en ons wag. . .Soos tante kan sien, gaan dit nog te lekker in ons landjie, behalwe vir die inkommers wat hier kom oorvat het. Gelukkig is hul tyd min en dan gaan ons weer begin om ons land op te bou en werk te gee aan die wat wil werk. Net jammer hulle het ’n groot klomp mense nou al laat dink dat dit te lekker is om op straathoeke te lê en dobbel en as jy iets wil hê, steel jy dit.Stuur groete daar anderkant van deur tot deur. Liefdegroete.Constant – 3 November 1992* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Kammaland te lekker!

Kommentaar

Republikein 2025-05-02

Meld asseblief aan om kommentaar te lewer

Kammaland te lekker!

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie