Jy kan altyd terugkom

Ons leef asof ons tyd het. 

Asof daar altyd nog ’n volgende jaar is, nog ’n kans, nog ’n beter oomblik om iets te doen. 

Ons beplan, ons wag, ons oorweeg elke moontlikheid totdat dit sin op papier maak. En partykeer is dit nodig maar soms is dit presies wat jou terughou.

Want die waarheid is, die lewe is korter as wat ons dink. Nie op ’n dramatiese manier nie, maar op ’n stil manier. Die dae gaan verby, die maande rol aan, en skielik kyk jy terug en besef jy het lank laas iets gedoen wat jou lewendig laat voel het. Jy het lank laas iets gedoen wat nie net veilig was nie, maar opwindend. Iets wat jou hart vinniger laat klop het.

Ons is so bang om verkeerde besluite te neem. Bang om te trek, om te verander, om iets nuuts te probeer. Bang om alles wat ons ken te los vir iets wat nie gewaarborg is nie. Maar wat as die risiko eintlik groter is om te bly waar jy is, net omdat dit gemaklik is? Om jare later te wonder “wat as?”, eerder as om te weet jy het ten minste probeer. 

Daar is iets ongelooflik bevrydend daaraan om soms net te beweeg. Om daardie impuls te volg. Om ja te sê vir die geleentheid wat nie perfek beplan is nie.

Om jou lewe bietjie deurmekaar te maak net om te sien wat gebeur. Want dis dikwels in daardie onsekere oomblikke waar jy jouself beter leer ken, waar jy groei, waar jy besef jy kan meer hanteer as wat jy ooit gedink het.

Ons vergeet dat min dinge permanent is. ’n Stad, ’n werk, ’n verhouding, ’n besluit, dit alles kan verander. Jy kan trek en weer terugkom. Jy kan iets probeer en weer begin. Jy kan ’n fout maak en dit regstel. Jou lewe is nie ’n eenrigtingstraat waar elke besluit jou vir altyd vaspen nie. Dis ’n pad met draaie, met ’n nuwe begin.

En tog leef ons asof dit so is. Asof een verkeerde tree alles gaan breek. Asof ons nie die reg het om te eksperimenteer, te dwaal, te probeer nie. Asof ons eers moet wag totdat ons heeltemal seker is, terwyl sekerheid selde ooit kom.

Miskien is dit tyd dat ons anders na ons situasie begin kyk. Dat ons besef die lewe vra nie altyd vir sekerheid nie, maar vir moed.

Dat jy nie alles hoef uit te werk voor jy begin nie. Dat jy soms net moet spring, nie omdat jy seker is nie, maar omdat jy nuuskierig is. Jy kan altyd terugkom. Maar jy kan nie altyd weer daardie kans kry om te gaan nie. 

– [email protected]

* Beste lesers, keuring vir die ­publikasie van WhatsApp, briewe en alle ander lesers­bydraes berus by Republikein. Klagtes oor die diens van ­private besighede word eers aan die onder­neming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.