Jou kreatiwiteit, jou redding

Dioné Izaks – Die onlangse balletproduksie bekend as Peter Pan, aangebied deur die Nasionale Balletskool, was meer as net ’n vertoning. Dit was inderdaad ’n herbelewing en nostalgiese terugblik na my eerste besoek asook verskeie optredes in die teater. Terwyl ek in die teater sit en toekyk hoe gesinne, jong getroude paartjies en kenmerkend trotse oumas en oupas hul sitplekke inneem en rustig raak, besef ek dat ek omring is met mense wie se geliefdes, kleinkinders of dalk sommer net ’n maatjie deel van die karakters in die spesifieke produksie vorm. Kort voordat die vertoning begin, gewaar ek hoe jong dogtertjies die trappe op en af waag om tog net vir een aand na die klik-klak geluid van hulle dogterjie-hakskoene te kan luister. En soos hulle die trappe op en af hardloop, draai en swaai hulle al in die rondte om lewe aan hul effe roospienk, blomagtige rokke te gee. Ek glimlag en staar na die visuele sirkeleffek wat vir hulle op daardie oomblik heelwat plesier verskaf. En terwyl ek nog so in die verte na hulle staar, laat dit my terugdink aan my eerste besoek na die Nasionale Teater amper 40 jaar gelede. Destyds het die teater as die Suidwes-Afrikaanse Raad vir die Uitvoerende Kunste, ofte wel SWARUK, bekend gestaan. Ek was op laerskool; Sub B dink ek. Amper agt jaar oud, maar ek kan die aand soos gister onthou, want in my geheue is dit vasgepen as een van die mees glansryke geleenthede wat ek as jong dogterjie ervaar het. Ek was my tannie se trotse metgesel na my eerste balletvertoning. My tannie, ofte wel aunty, was klassiek en stylvol geklee en my oupa se babasuster wat besoek afgelê het se uitrusting was afgerond met ’n deftige bruin pelsagtige baadjie. Dit was ’n wintersaand en my ma wou nie hê ek moes afsteek nie, dus het ek my lang-swart-mou-kerkrok, kerk-sykouse en swart blink Mary Janes aangehad. My kerkuitrusting was met stywe bypassende blomhaarknippies in my hare afgerond. Bo en behalwe dat ek destyds meegevoer was deur die ballerinas en die produksie, sal ek nooit vergeet hoe klein ek was nie, omdat my voete op daardie stadium nie die bodem van die vloer kon raak nie. So, my onlangse aand uit na die plaaslike Peter Pan-produksie was nie net sommer nog ’n aand uit nie, maar ’n aand van herinnering, nuwe insig en opregte waardering teenoor kuns, as ek dit so mag noem. Dit wil voorkom asof daar deesdae nie juis meer veel aanspraak of klem gelê word op die kunste nie of dat die jonger generasie nie belang stel nie, maar inteendeel was ek dié Vrydagaand aangenaam verras oor die aantal jongmense se teenwoordigheid by die spesifieke geleentheid. Kuns in enige vorm is nie net iets mooi nie. Dit speel ’n deurslaggewende rol in hoe ons as mense funksioneer en hoe ons kuns gebruik om uiting aan ons verborge emosies te gee. Kuns is ’n vorm van selfuitdrukking en help dikwels mense om ingewikkelde sosiale situasies uit te beeld of ten toon te stel. Dit dien as ’n veilige uitlaatklep mits dit nou in die vorm van beeldende kuns, kinematografie, literatuur, musiek of toneelspel daargestel word. Dit dra by tot goeie welstand en goeie geestesgesondheid. Dit bevorder ’n gevoel van prestasie en is goed vir ’n mens se selfbeeld en siel. As dit by kinders kom, dra dit tot gesonde ontwikkeling van kinders by. Dit ontwikkel fyn motoriese vaardighede, kognitiewe groei asook sosiale vaardighede.So dans met passie, sing uit volle bors, trek jou verfkwaste en kunsflyt-bykomstighede nader en kleur jou lewe in met jou unieke kreatiwiteit, want die kunste en kunsvorms is hier om te bly en te geniet.– Gasskrywerizaksdione81@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Jou kreatiwiteit, jou redding

Kommentaar

Republikein 2026-05-14

Meld asseblief aan om kommentaar te lewer

Jou kreatiwiteit, jou redding

Kommentaar

Republikein 2026-05-14

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.