Hou jou kop omhoog
Hou jou kop omhoog, selfs al woed die storm om jou, selfs al waai die wind en skud die aarde, selfs al word die son ook deur die donker wolke verduister en lyk die pad vorentoe onoorkomelik. Daar is altyd ’n weg, selfs al sien jy dit nie. Hou aan. Bly kalm. Wees standvastig. Gee net nog ’n tree vorentoe. Jy sal oorwin.
Jou oorwinning lê in jou volharding. Dit lê daarin om vas te hou aan die geloof dat die Here jou sien, die Here jou hoor en die Here jou sal red wanneer dit Sy wil is. Wag op die Here. Moenie moed opgee nie. Moenie swig nie. Bewaak jou siel.
Die wêreld wil ons almal oortuig jy moet jou menslikheid prysgee, jou waardes verraai en jou innerlike wete van reg en verkeerd ignoreer.
Die samelewing gooi dikwels voorbeelde van die prestasies van kwaadwillige mense in jou gesig. Hul prestasies is egter hol. Baie klou en gryp en trek hul medemense af om bo uit te kom. Tog is daardie bergpiek ’n eensame en verlate plek sonder betekenis en sonder waarde. Hulle omring hulself met blinkende juwele, met duur voertuie en luukse besittings, maar die glans gaan vinnig verlore, die voertuig breek en die eggo van leë gange dreun in hul ore.
Wat werklik waardevol is, word nie deur ’n prys bepaal nie. Geld kan dit nie koop nie. Dit word deur harde werk en eerlike dade, soos liefde en lojaliteit, verdien.
Die skatte van die lewe is tydloos en bly in jou geheue, in jou hart, in jou selfbeeld en in jou dade.
Dis die oomblikke wat jy opreg met jou medemens deel, dis die tye wanneer jy een is met die natuur, dis die bevrediging wat kom met die wete jy het jou beste gegee en die vrede wat jy voel wanneer jy jou waarheid eerbiedig. Die kosbaarste dinge in die lewe neem net ’n oomblik, maar dit bly ’n leeftyd by jou.
Wees waaksaam vir die lokvalle van die samelewing. Dit wat die wêreld as goed ophef, is dikwels leë doppe. Soek die kern en klou daaraan vas.
Onthou die lewe is ’n gawe en nie ’n beloning vir jou mededingendheid nie. Jy verdien dit nie, tog is dit aan jou gegee en vir jou geskep. Uniek, en net vir jou, want niemand anders se lewe kan ooit presies soos joune wees nie.
Daarom het jy die verantwoordelikheid om jou lewe tot die beste van jou begrip en vermoëns te lewe. Hierdie verantwoordelikheid is enorm en glad nie eenvoudig nie. Jy sal misluk. Tog is so ’n mislukking glad nie die einde nie, dit is slegs ’n geleentheid om beter te verstaan, beter te doen en beter te wees.
Eerder as om met Jan of Piet of met Susan of Sarah mee te ding, moet jy daarna streef om die beste jy te wees wat jy kan wees. Erken jou tekortkominge en werk daaraan. Gebruik jou sterkpunte om ander te help, te leer en op te hef.
Aan die einde van die dag, wanneer jy daar op jou sterfbed lê, sal jy weer alleen wees, met net die herinneringe aan jou eie lewe om jou te troos. Al die geld in die wêreld sal jou dan niks baat nie.
Al die eer en respek, al die mag van jou leiersposisie sal jou nie kan red nie. Die vrees wat jy dalk in ander aangewakker het, sal die dood nie kan keer nie. Die invloed waarna jy gestreef het, sal niks kan verander nie.
Dis die liefde wat jy gedeel het, wat vrede bring. Dis die goed wat jy gedoen het wat onthou sal word. Dis die voorbeeld wat jy in moeilike tye gestel het wat ’n nalatenskap skep. Dis wat jy vir ander beteken het wat jou lewe die moeite werd sal maak.
Werk daaraan sodat wanneer jy aan die einde van jou lewe kom, jy dit sonder spyt sal kan agterlaat. Dis baie werk. Dis goeie werk. Dis waardevolle werk en werk waarop jy trots kan wees.
Daarvoor moet jy nou jou kop omhoog hou. Daarvoor moet jy moed hou. Daarvoor moet jy aanhou.
– [email protected]
* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.
Jou oorwinning lê in jou volharding. Dit lê daarin om vas te hou aan die geloof dat die Here jou sien, die Here jou hoor en die Here jou sal red wanneer dit Sy wil is. Wag op die Here. Moenie moed opgee nie. Moenie swig nie. Bewaak jou siel.
Die wêreld wil ons almal oortuig jy moet jou menslikheid prysgee, jou waardes verraai en jou innerlike wete van reg en verkeerd ignoreer.
Die samelewing gooi dikwels voorbeelde van die prestasies van kwaadwillige mense in jou gesig. Hul prestasies is egter hol. Baie klou en gryp en trek hul medemense af om bo uit te kom. Tog is daardie bergpiek ’n eensame en verlate plek sonder betekenis en sonder waarde. Hulle omring hulself met blinkende juwele, met duur voertuie en luukse besittings, maar die glans gaan vinnig verlore, die voertuig breek en die eggo van leë gange dreun in hul ore.
Wat werklik waardevol is, word nie deur ’n prys bepaal nie. Geld kan dit nie koop nie. Dit word deur harde werk en eerlike dade, soos liefde en lojaliteit, verdien.
Die skatte van die lewe is tydloos en bly in jou geheue, in jou hart, in jou selfbeeld en in jou dade.
Dis die oomblikke wat jy opreg met jou medemens deel, dis die tye wanneer jy een is met die natuur, dis die bevrediging wat kom met die wete jy het jou beste gegee en die vrede wat jy voel wanneer jy jou waarheid eerbiedig. Die kosbaarste dinge in die lewe neem net ’n oomblik, maar dit bly ’n leeftyd by jou.
Wees waaksaam vir die lokvalle van die samelewing. Dit wat die wêreld as goed ophef, is dikwels leë doppe. Soek die kern en klou daaraan vas.
Onthou die lewe is ’n gawe en nie ’n beloning vir jou mededingendheid nie. Jy verdien dit nie, tog is dit aan jou gegee en vir jou geskep. Uniek, en net vir jou, want niemand anders se lewe kan ooit presies soos joune wees nie.
Daarom het jy die verantwoordelikheid om jou lewe tot die beste van jou begrip en vermoëns te lewe. Hierdie verantwoordelikheid is enorm en glad nie eenvoudig nie. Jy sal misluk. Tog is so ’n mislukking glad nie die einde nie, dit is slegs ’n geleentheid om beter te verstaan, beter te doen en beter te wees.
Eerder as om met Jan of Piet of met Susan of Sarah mee te ding, moet jy daarna streef om die beste jy te wees wat jy kan wees. Erken jou tekortkominge en werk daaraan. Gebruik jou sterkpunte om ander te help, te leer en op te hef.
Aan die einde van die dag, wanneer jy daar op jou sterfbed lê, sal jy weer alleen wees, met net die herinneringe aan jou eie lewe om jou te troos. Al die geld in die wêreld sal jou dan niks baat nie.
Al die eer en respek, al die mag van jou leiersposisie sal jou nie kan red nie. Die vrees wat jy dalk in ander aangewakker het, sal die dood nie kan keer nie. Die invloed waarna jy gestreef het, sal niks kan verander nie.
Dis die liefde wat jy gedeel het, wat vrede bring. Dis die goed wat jy gedoen het wat onthou sal word. Dis die voorbeeld wat jy in moeilike tye gestel het wat ’n nalatenskap skep. Dis wat jy vir ander beteken het wat jou lewe die moeite werd sal maak.
Werk daaraan sodat wanneer jy aan die einde van jou lewe kom, jy dit sonder spyt sal kan agterlaat. Dis baie werk. Dis goeie werk. Dis waardevolle werk en werk waarop jy trots kan wees.
Daarvoor moet jy nou jou kop omhoog hou. Daarvoor moet jy moed hou. Daarvoor moet jy aanhou.
– [email protected]
* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.
Kommentaar
Republikein
Geen kommentaar is op hierdie artikel gelaat nie