Handsketse te koop

Ek weet nie van jou nie, maar my wêreld het die afgelope weke behoorlik gegons oor artificial intelligence, ofte wel AI.

Ons hoor al dekades lank in wetenskapsfiksie oor hoe die masjiene ons werk en lewens gaan oorneem, net om op die ou einde die mensdom in ’n bloedbad uit te wis.

Ek het bietjie op die internet gaan rondsnuffel, maar kon geen teenbloedbadmaatreëls kry nie. Miskien het ek nie hard genoeg gesoek nie, maar ek is geneig om te dink dat dié bloedbad ons voorland is.

Op ’n ironiese manier maak dit die lewe vir ons baie makliker as ons die massaslagting aanvaar, want nou het ons net een probleem om onsself oor te bekommer: Hoe verdien ek ’n inkomste om te oorleef tot R2-D2 my die dag kom jag?

Terwyl ek berigte oor AI lees en in my onvertroosbare smart sit en kwyn asof ek kiekies van wyle mamma of ’n eks-iemand sit en deurblaai, loop ek toe ’n interessante brokkie inligting raak wat moontlik die inspirasie vir my AI -weerstandige loopbaan kan wees. AI kan nie hande teken nie.

Enige persoon wat al ooit ’n potlood opgetel en hulself belowe het hulle sou iets mooi daarmee skep, weet dit is selfs vir mense ’n stryd om hande in proporsie te teken.

Selfs al het ek nie ’n kunstige haar op my kop nie, sal my poging glo beter wees as AI s’n.

Nou kom die vraag. Hoekom kan AI nie hande teken nie? Dit het blykbaar iets te doen met die dimensies van hande waar verskeie onreëlmatige vorms bymekaargevoeg word. Een spreker verduidelik selfs dat dit nog ’n rukkie sal neem voor AI hande kan teken wat outentiek sal lyk, glo omdat daar juis iets intiem en menslik oor hande is wat AI nie kan begryp nie.

Die nut en doel van hande is glo nog iets wat AI nie kan begryp nie en daar is ook iets te sê oor die feit dat AI tweedimensionele beelde gebruik om ’n komplekse driedimensionele voorwerp te skets.

Daar is klaarblyklik ’n goeie kans dat AI in die toekoms ’n beter begrip sal hê van hoe om hande te teken en dan is my kunsloopbaan daarmee heen. Dalk kan dit vir my genoeg tyd koop om aan iets beter te dink. Tot die volgende idee my byval, het ek sketse van hande te koop.

Ek was nog altyd baie lief vir stabiliteit, so ek weet nie of ek kans sal sien om van een beroep na ’n volgende in ’n kort tydjie te skuif nie. En wie weet, dalk slaan ek, soos die tannies by die basaars wat hul pragtige kunswerke uitstal, ’n kunsstalletjie van my eie by die bloedbadgeleentheid los. Ek sal dalk net vooraf met Riana die Robot moet reël dat sy ’n ogie oor my stalletjie hou wanneer dit my beurt is.

– [email protected]

* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.