Gun mense liefde

Teen die tyd wat ons almal môre werk toe gaan is Valentynsdag vir talle paartjies al lank vergete. Die bos blomme is vir vroulief op die kombuis se toonbank gelos en vroulief het al vir manlief ’n soen op die wang gegee om dankie te sê – dis mos nou verby. Sommige paartjies wat nog jonk en verlief is mag dalk planne maak om iewers ’n romantiese ete te gaan geniet, maar teen daardie tyd het die skoliere wat N$5 betaal het om gewone klere skool toe te dra, lankal hul pienk of rooi T-hemde uitgetrek. Daar is egter ’n deel van die bevolking wat, soos ek, nie ’n Valentyn het nie. Vir my is dit ’n keuse, maar vir van die ander is dit ’n doring in hul vlees. In ’n poging om hul eie wonde te lek, vier hierdie spul anti-Valentynsdag – soos Valentynsdag, maar in plaas daarvan om ’n romantiese fliek saam met jou geliefde te kyk, kyk hulle eerder flieks oor liefde wat uitmekaar val en in plaas daarvan om “soppy romcom”-boeke te lees, lees hulle boeke wat voorstel dat romanse giftig vir die mensdom is. Ek het self deur ’n fase gegaan waar ek die grappies oor Valentynsdag geniet het, maar op die ou end het daardie grappies nie die dag vir my beter of slegter gemaak nie. Dit was nog nooit so snaaks dat ek uit my maag uit daarvoor gelag het nie en as jy my nou vra sou ek nie een kon onthou nie. Wat is die punt daarvan om anti-Valentynsdag te vier? Hoekom gaan jy uit jou pad om iets te anti-vier? As jy nie die dag wil vier nie, kyk net anderpad. Dit is nie nodig om in jou kamer te sit en knorrig te wees oor die feit dat almal anders iets vier nie. Die liefde is lekker – laat diegene wat dit het dit geniet. Hulle dink in elk geval nie aan jou tydens hul romantiese ete nie, hoekom gebruik jy jou tyd om aan hulle te dink? Om enkellopend te wees is in elk geval nie ’n morele mislukking nie, en ook nie ’n aanduiding van jou waardigheid (of gebrek daaraan) nie. Eendag sal jy ook Valentynsdag saam met jou liefie kan vier, maar vandag is net nie daardie dag nie. Hoekom moet ons onsself altyd deel maak van alles? As jy nie hierdie Valentynsdag ’n liefie het nie, moet eenvoudig nie daaraan deelneem nie. Jy hoef nie moedswillig te wees en jou tyd mors om vir Valentynsdag te wys wie is baas nie. Dit is in elk geval nie jy wat baas is nie, so hoekom wil jy betrokke raak? Gun mense liefde en laat hulle toe om dit te geniet sonder jou alewige hoofkaraktersindroom waar ’n dag wat nie vir jou bedoel is nie, om jou moet draai. – irene-mari@nmh-hub.com.na* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Gun mense liefde

Kommentaar

Republikein 2026-02-04

Meld asseblief aan om kommentaar te lewer

Gun mense liefde

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.