Geseënd vir ’n rede

Die gedagte het al ’n paar keer by my kom vassteek, hoe sommige mense meer as ander geseën word. Het jy ook dalk gewonder hoekom jy meer as ander geseën word, of fokus jy op ander mense se vooruitgang? ’n Ruk terug staan ek by die vulstasie om brandstof in te gooi. Ek besef terwyl die meter loop, al wil ek ook ’n kompromie met myself aangaan, het ek geen keuse, ek moet beslis by my bestemming uitkom. Maar ek wil nie so voel as ek my sente uitgee nie. So asof dit ’n straf is. Net daar en dan besluit ek om elke sent en dollar wat ek uitgee, te seën. Ek seën die liters brandstof sodat dit my verder kan neem en seën ook die petroljoggie, want ons almal kan mos doen met bietjie voorspoed. Ek voel sommer onmiddellik beter en dit begin toe ’n gewoonte raak. Elke keer as ek ’n betaling moet maak of geduldig op iemand moet wag om aan my ’n diens te lewer, seën ek eerder as om ongelukkig weg te gaan.Nie almal is egter in ’n posisie om ander met ’n geldjie te seën nie, maar wat is in jou hande? Sal jy ook jou talente wegbêre in plaas daarvan om daarmee te werk en ander te dien? Want een waarheid wat ek duidelik gesien het, is dat aan diegene wat woeker met sy of haar talente, word meer verantwoordelikhede gegee en hulle word meer vertrou. Kan ons vertrou word met meer, of sal ons die bietjie in ons hande gaan wegsteek sodat niemand dit kan steel nie?Die geleenthede sal kom en gaan, maar terwyl ons fokus op die seëninge en welvaart van ander, sal daardie geleenthede ongesiens verbygaan. Ons hoor dikwels van mense se suksesverhale, wat uit minderbevoorregte omstandighede gestyg en toe uitgeblink het. Hulle dryfkrag – om nooit te vergeet waar hulle was en die pad wat hul moes loop nie. Dalk het ons oë blind geraak vir die geleenthede, want al wat ons sien is swaarkry en probleme. Kan ek ’n stuiwer in die armbeurs gooi en sê, daar is baie meer wat in jou steek as jou ongunstige omstandighede en mense wat jou nie raaksien nie. Solank jou hart nog klop het jy ’n doel in hierdie leeftyd. Die grootste geveg is egter in jou verstand. Waarmee voed jy jou gedagtes, want dit bepaal mos jou dade en verdere uitkoms.So, wat is in jou beker wat jy kan uitgiet? Waarmee word jy geseën, wat jy op jou beurt jou gemeenskap, vriende en familie mee kan dien en seën? Die vraag moet dalk nie wees hoekom ander meer geseën word nie, maar eerder wat verhoed dat jy die geleenthede padlangs raaksien? Moet nie ’n klein begin verag nie, maak nie saak hoe klein of onbeduidend dit mag lyk nie. Gebruik dit wat in jou hande is, woeker daarmee en werk, want daar is Een wat jou altyd sal beloon.– Gasskrywermarliseizaaks@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Geseënd vir ’n rede

Kommentaar

Republikein 2026-05-05

Meld asseblief aan om kommentaar te lewer

Geseënd vir ’n rede

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.