Geen plek op aarde soos jou ouerhuis

Ek dink talle ouers is bekommerd en angstig oor hul kinders. Veral tieners. Veral dogters. Ek wil julle vandag verseker kinders gaan altyd terug huis toe.

Tieners rebelleer en toets die grense. Ek kan my net indink hoe moeilik dit moet wees om ’n balans te handhaaf. Hoe gee jy jou kinders genoeg vryheid sodat hulle hul eie foute kan maak en belangrike lesse kan leer (eerder nou as later) en terselftertyd hulle teen seerkry of foute te beskerm wat hul lewens heeltemal kan verwoes?

Dit is ’n ontdekkingsfase. Tieners is deurmekaar oor wie hulle is en dit is nodig om soms in die soektog na jouself te verdwaal.

Ek onthou my tienerjare en hoe ek en my ouers kop gestamp het. Hulle het my beskerm en gewaarsku, maar ek moes my eie lesse leer. En ek het, glo my. Sommer baie.

As ek nou terugkyk, is dit duidelik my ouers was reg oor alles en hoewel ek nie altyd geluister het nie, is ek dankbaar dat hulle soms streng was.

Ek het ’n inkomtyd gehad, selfs toe ek nog op universiteit was. Dit het natuurlik verskil van dié van my broer wat net twee jaar ouer as ek is en saam met my op universiteit was. Ek verstaan nou daar is baie meer gevare vir meisies, as seuns.

Ek sien hoe tieners en studente, wie se ouers dalk bietjie té veel vryheid gee, baie onverantwoordelike besluite neem. Hulle maak hul skuldig aan dronkbestuur (met hul eie motor natuurlik, wat pappa betaal het), rook en gebruik dwelms. Dié goed is baie meer algemeen as wat jy dink.

Soms is dié mense gelukkig en kom daar niks van hul onverantwoordelike optrede nie, “no harm no foul, right?”, maar dit kan ernstig skeefloop.

Ek praat nie as ’n ouer nie, want ek is nie een nie. Ek praat as iemand wat onlangs nog op universiteit was en self soms as tiener gerebelleer en gesien het wat ander jongmense aanvang.

Kinders gaan rebelleer. Hulle gaan die grense toets, maar hoe minder reëls hoe erger die nagevolge. Ofte wel, dit is my siening.

Sommige ouers vrees dalk as jy te streng met jou kind is, hulle dalk kwaad vir jou sal raak en dit julle verhouding permanent kan skaad. Ek belowe jou, jou kind sal altyd lief vir jou wees en daar gaan ’n tyd kom wat jou kinders weer terug huis toe sal keer, maar slegs as dit ’n huis was van liefde en jou reëls vanuit ’n plek van omgee gekom het.

Dis belangriker om vir jou kind ’n huis te bou waar hulle veilig en gelukkig is, eerder as om seker te maak jy is altyd in jou kind se goeie boekies.

Wanneer ek as student hartseer was, laat aande moes studeer of ’n toets gedruip het, wou ek net met my ma praat. Nou nog, in harde tye, dan wil ek terug in my ouerhuis wees waar dit voel asof al my sorge verdwyn.

Ek sien dit ook met my man – daar is geen ander plek op aarde waar hy homself kan wees soos in sy ouerhuis nie. Dit bring die kind in hom uit. Hy terg sy sussies, stoei met sy pa en geniet elke laaste happie van sy ma se kos. Dit is die mooiste ding om te sien.

As ek sien hoe my ouers met hul kleinkinders is, sien ek baie uit na die tye wat voorlê. Ek sien uit dat my eie kinders ook die liefde van my ouerhuis ervaar.

Vir al die ouers daarbuite. Dit maak nie saak hoe kwaad jy jou kinders maak nie, as hulle weet hoe lief jy hulle het, sal hulle altyd terugkom huis toe.