Ek sê maar net - Groot kar veilig

Aldo HornGroot kar veiligAlmal weet groot karre is baie veiliger as klein karre.Wanneer ek praat van groot karre, bedoel ek nie bakkies wat kan gebruik word om ’n sitkamerbank op te tel, of die yskas te skuif nie. Ek praat van gróót karre. Die soort waar die bonnet tot amper by my skouer kom - die skouer van ’n 1,82 meter persoon. Die soort wat elke artikel en advertensie belowe die veiligste kar op die mark is. Die soort wat mý gesin sal beskerm in ’n ongeluk, wanneer ek nie die graad tweetjie oor die pad sien hardloop nie, omdat die bonnet hoër as sy kop is. Gelukkig het ek hierdie groot kar gehad, anders kon dié 25 kg seuntjie groot skade aan my gesin, of nog erger, my kar gerig het. Maar net só (verbeel jou jy hoor my vingers klap) is daardie gevaar geneutraliseer, want groot kar veilig.Selfs as dit ’n ander kar is, hoef ek nie te bekommer nie. Ons weet dat in die geval waar ’n kar en ’n motorfiets in ’n ongeluk beland, is dit baie veiliger vir die kar. Dít is hoekom ek ’n groot kar het, sodat as ek in ’n ongeluk is, maak my kar van al die ander karre sommer motorfietse. Al wat dit my gaan kos, is die beter deel van ’n miljoen Namibiese dollar, maar dis oukei. Wanneer ek die ander kar sien opvou en die bestuurder verdwyn onder die skrootystergraf in die ongeluk, sal dit alles die moeite werd wees, want mý gesin is orraait - ek was dié keer wel alleen in die kar, want my vrou het die naweek die kinders. Maar wanneer hulle volgende Saterdag by my is (hulle moet, die hof het so gesê), sal hulle niks oorkom nie, want groot kar is veilig.My enigste bekommernis is natuurlik dat ander mense ook hierdie foutlose strategie sal raaksien. Wat as hulle ook besef 'n groot kar is veilig en ’n groter kar as ek koop? Ek kan myself dit nie eers indink nie - ek gaan dan die een in die klein karretjie wees! O gits, dis te gevaarlik om só tussen al hierdie groot karre te ry; ek sal dan ’n kar koop wat selfs nog groter is.Julle sal dit nie glo nie! Nadat ek ’n groter kar gekoop het as die mense om my, het hulle ook besluit om ’n groter kar te koop (dit maak sin, want groot kar veilig). Nou moet ek weer my kar vergroot. Die paaie raak te klein vir die groot karre, daar is geen parkering waarin my kar kan pas nie, en die leer wat ek gebruik om by my kar in te klim is nie meer lank genoeg nie.Maar ek het ’n plan: Om seker te maak dat my gesin veilig is, het ek ’n Panzer VIII Maus in die hande gekry. Met hierdie Tweede Wêreldoorlog-tenk sal niks in my pad kan staan nie - ek ry direk bo–oor die karre wat my gesin in gevaar probeer stel, kinders hardloop en gil soos wat ek deur die skoolhek jaag sodat my kinders nie vêr hoef te stap nie (wie weet hoe gevaarlik dit deesdae in die strate is met al hierdie groot karre). Polisiesirenes skree agter my, maar hulle karretjies is te klein om enigiets aan my te doen - ek lag want hulle weet nie van groot kar veilig nie. Die weermag word ingeroep, maar hulle tenks staan nie ’n kans teen myne nie. Ek kan skaars glo hoe erg dinge deesdae op die pad is - darem sal ek niks oorkom in my kar nie.Want natuurlik: groot kar veilig... behalwe as jy nie die een in die groot kar is nie.

Ek sê maar net - Groot kar veilig

Kommentaar

Republikein 2026-11-03

Meld asseblief aan om kommentaar te lewer

Ek sê maar net - Groot kar veilig

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.