Ek ‘move’

Otis Daniels-Finck – Ek gaan die kus vir ’n betonoerwoud verruil. Waarom sou enige iemand só iets wil doen, wonder almal rondom my. Die antwoord is eenvoudig. Die wêreld draai, seisoene kom en gaan en die mens groei, so my redes is persoonlik.Ek moet byvoeg ek gaan darem nie vir ewig verlore wees vir my familie by die kus nie en ek sien uit na die vis wat uit daardie rigting gepos gaan word. Toe Christo Retief my amper 10 jaar gelede gewerf het om by Namibia Media Holdings (NMH) as ’n verslaggewer aan te sluit, het ek min geweet waarna die onbekende lewensweg by die grootste nuusmaatskappy in Namibie my sou lei. Dankie vir die kans, Arrie Hougaard. Wanneer ek so terugkyk op 10 jaar, kan ek opreg sê vanaf my eerste dag aan diens – op 15 Augustus 2014 – was en bly dit beslis ’n opwindende reis. Ek begin skryf en neem foto’s vir die daaglikse koerante (Republikein en Namibian Sun) en so af en toe word van my berigte ook in Duits vertaal. Ek skuur skouers met die bestes in die land en die mense van die kus se gemeenskap lees meer oor hulle eie doen en late in Erongo 24/7. Dit spoor my aan. Ná Christo se ampstermyn, maak ek in lewende lywe kennis met die legendaries “Oom” Des Erasmus (rus in vrede) en sy vrou, Annelie, wat die leisels oorneem. Ons het dikwels koppe gestamp. Ek leer egter ontsettend baie in sy teenwoordigheid en saam met Dani Booysen en Ronelle Rademeyer word my passie vir Afrikaans aangevuur. Ek groei van ’n skrywer tot ’n televisie-aanbieder. NMH betree die aanlyn uitsaaiwese en ek wandel saam. Die ondervinding wat ek in die stad van goud “Johannesburg” by groot geeste soos die aanbieder Freek Robinson (Fokus) by die SAUK en die befaamde dokumentêre regisseurs Kevin Harris en Eugene Paramoere opgedoen het, kom my egter goed te pas.Ek kan maar net lag wanneer ek dink aan die leerproses en alles wat agter die skerms aangaan en nie beskore is vir die kykers se oë en ore nie. Op ’n dag in die Swakopmund-kantoor deel ons uitvoerende hoof almal mee dat ek nou in beheer is as nuusredakteur van die Erongo 24/7-kantoor. Dankie vir nog ’n geleentheid, Albé Botha. Aan die begin het dit maar geknetter met die menseverhoudinge en die administrasie. Met verloop van tyd rus die maatskappy my egter toe met die nodige kennis in die vorm van aanlyn kursusse en ek groei verder.Nog ’n hoofstuk is geskryf toe ons begin het om sportwedstryde regstreeks aanlyn uit te saai en ek diens as kommentator doen. Daar kom toe ’n uitsaai-ateljee op Swakopmund sowel as ’n mobiele uitsaai-ateljee vir die kus. ’n Digitale (Network Television)-kanaal op twee televisiekanale (DStv en GOtv) en ’n aanlyn radiostasie maak hul verskyning.En dit is my storie en hy is besig om verder te ontvou. Daar is nog heelwat ink in my pen en ek is dankbaar vir almal in my gemeenskap wat so ’n beduidende rol in my loopbaan speel. Dit is altyd effens makliker om nie tot siens te sê nie maar tot ons mekaar weer sien. Ek weet tyd is iets wat vir niemand wag nie, so ek hoop julle verstaan ek moet vir eers “move”. – otis@erongo.com.na

Ek ‘move’

Kommentaar

Republikein 2025-11-03

Meld asseblief aan om kommentaar te lewer

Ek ‘move’

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.