Droom jou eie Namibië

Ek dink ons Namibiërs moet meer aandag gee, en tyd bestee, om ons eie utopiese Namibië te verbeel.

Ons moet so noukeurig en spesifiek nadink oor die land wat ons elkeen graag wil hê Namibië moet word, sodat die prentjie helder en ingekleurd in ons gedagtes is.

Ons gee nie genoeg aandag aan die besonderhede van die doelwit van nasionale ontwikkeling nie. Sodoende sal ons dadelik kan sien wanneer dinge skeefloop.

My Namibië sou glad nie deur industriële nywerhede oorheers word nie, maar sou liewer gekenmerk word deur selfstandige burgers wat saamstaan en mekaar help om dag tot dag almal se lot te verbeter.

In my verbeelding begin dit alles met duisende omgewingsvriendelike klein watergolf-aangedrewe kragopwekkers wat oral langs die verlate woestynkuslyn geplaas is.

Die krag sou talle klein ontsoutingsaanlegte aandryf, wat dag in en dag uit vars water uit die see sou onttrek en dit deur pypleidings na opvangtenks sou herlei.

Hierdie fasiliteite is doelbewus ontwerp en gebou om gratis toegang tot vars water vir almal te vergemaklik, met ingeboude kraan- en besproeiingaansluitings met die bevordering van ’n selfhelpbenadering.

Daar word son- en windkrag ingespan om die water op te pomp na torings wat dien as die beginpunt van langafstand-pypleidings met liggies skuins hellings, wat oor die woestyn strek.

Vanaf die pypleidings kan water maklik plek-plek afgetap word, maar almal lei uiteindelik die voortdurende stroom water na die binneland.

Elke deel is so saamgestel dat plaaslike inwoners dit maklik instand kan hou en foute vinnig kan regstel. Die stelsel verskaf ’n deurlopende toevoer van vars water wat gratis aan inwoners beskikbaar gestel word.

Dink net wat gratis vars water in ons woestynland sou beteken. Die impak sal na elke aspek van ons samelewing deurvloei. Ons land sou heeltemal anders daarna uitsien.

Ons het oorgenoeg grond in Namibië, maar so baie van daardie grond is onvrugbaar. Die groot tekort is water. Stel jou voor as ons regering water gratis kon verskaf! Elkeen sou sy eie tuin kon begin, sy eie kontantgewasse van die grond af kweek! Ware onafhanklikheid is binne ons bereik!

Verder word die universele basiese inkomstetoelaag so toegepas dat slegs diegene wat die geld só broodnodig het en bereid en in staat is om persoonlik gedurende kantoorure in lang rye te staan om dit elke maand af te haal, dit ontvang.

Alhoewel hierdie geld nie genoeg is om enigiemand toe te laat om net op die toelae te oorleef nie, help dit geweldig om ’n fondament te skep waarop inkomstegenererende aktiwiteite gebaseer word.

Entrepreneurskap vorm ’n kerndeel van ons hersiene skoolkurrikulum, wat daarop gemik is om die kennis te verskaf oor hoe om iets te doen, hoe dinge werk en hoe om by te dra tot die verbetering van die samelewing, eerder as hoe om eendag ’n werknemer te word.

Van kleins af word Namibiërs voorberei om ’n oase in ’n wêreld vol struikelblokke te skep, vir hulself en hul medemens.

Praktiese betrokkenheid by alles van plaaslike politiek tot die verskaffing van dienste, die veiligheid van bure en die instandhouding van nasionale bates word opgeskerp.

So ook word Namibië ’n veilige hawe in die voortdurende storms van wêreldpolitiek, waar mede-Afrikane in hul eie reise na ’n beter toekoms beweeg.

Stabiliteit, voorsorg en toegang tot hoëgehalte-onderwys lok studente van oraloor die vasteland, terwyl toeriste ons goed versorgde wild en natuur kom bewonder, beleggers meeding om aan ons voorspelbare ekonomie deel te neem en selfs vulgtelinge na die land van die brawes kom, want hul menswaardigheid sal hier herstel word.

Bedagsaam en vriendelik, verwelkomend en diep trots op wat gebou is, stel die Namibiese samelewing ’n voorbeeld vir Afrika, met talle aspekte wat besoekers tuis wil navolg.

Namibiërs is diep bewus van hul geskiedenis oor eeue van ongelykheid en uitbuiting en is dus almal toegewy tot doelbewuste ingrypings tot die billike herverdeling van die land se rykdom deur sosialistiese subsidies vir die noodsaaklikhede van die handhawing van waardigheid, gefinansier deur belasting van tot die helfde van die rykstes se maandelikse inkomste.

Die Namibiese paspoort is gesog oor die wêreld. Die Namibiese kind is vol selfvertroue en verwagtinge op ’n goeie, waardevolle lewe vol liefde. Ek sien dit in my gedagtes en dit spoor my aan om dit te bewaarheid.

Kom ons droom almal ons eie Namibiese drome, al is dit ook net vir ons eie huisie of spoggerige motor. Kom ons stap dus saam ’n tree nader om ons Namibiese drome uit te leef.

– [email protected]



* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.