Drempelvrees

Hierdie tyd van die jaar is die meeste mense se gevoelswêrelde deurdrenk met wat die Nederlanders “drempelvrees” noem. Ons sien die hele jaar uit na die Desembervakansie, die einde van die eksamens en die sperdatums. . . maar ewe skielik wil ons die afstandbeheerder gryp en tyd stadiger laat verloop. Die hoogtepunt van die jaar balanseer op ’n mespunt. Die gevolglike onhandigheid waarmee ons die laaste paar maande van die jaar hanteer, maak dan baie sin. Ons stres oor die skoolskoene wat al híérdie jaar geknyp het, die beslistheid waarmee vleispryse klim, en die brandstofprys wat die lug inskiet soos ’n bloedrooi fleur. Om alles erger te maak, word die finansiële galg net verder styfgetrek deur die verwagtinge wat met die feesseisoen gepaardgaan. Ons staan op die voorstoep van ’n nuwe jaar, reg om te klop aan die deur, en al wat in ons pad staan is ’n spekvet, kommersiële Kersvader. Mariah Carey se stem galm uit huisbakke, die plastiekbome van laas jaar word afgestof en opgehef, die gebruiklike groen, rooi en goue tinsel rank tussen die rakke wat kreun onder geskenke wat nét gekoop en toegedraai moet word. Pikante sneeumanplakkers pronk in winkelsentrumvensters terwyl daardie einste vensters die papnat geswete, haastige figure weerspieël wat boggelrug dra aan winskopies. Dit voel of die hele samelewing begeesterd is oor die hang van stringe liggies, maar nie die ware boodskap wat Kersfees bring nie. In hierdie tyd van “drempelvrees” en sente omdraai (en weer omdraai) is dit belangrik om tyd met jou geliefdes deur te bring. Gladde bokse, blink papier en glinsterende linte is beslis mooi en lekker, maar die grootste geskenk wat ons kan kry, kan nie gekoop word nie. Dit kan nie toegedraai of onder ’n boom gesit word nie, want dis tyd. So die vraag is: Hoe gaan jy jou duurste, kosbaarste geskenk hierdie jaar spandeer? Elsa VisserDeeltydse Afrikaansdosent Universiteit van Namibiëelsavisser65@gmail.com

Drempelvrees

Kommentaar

Republikein 2026-11-13

Meld asseblief aan om kommentaar te lewer

Drempelvrees

Kommentaar

Republikein 2026-11-13

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.