Die volwasse lewe het geen handleiding

Ek weet nie wie besluit het dat volwassenheid van buite so maklik lyk nie, maar ek wil graag met daardie persoon gesels. 

Net ’n vinnige geselsie. Oor koffie. Baie koffie.

As kind het ek gedink grootmense het al die antwoorde.

Vandag besef ek die meeste van ons stap net rond met ’n motorlisensie, ’n bankkaart en ’n gesigsuitdrukking wat sê: “Ek weet presies wat ek doen.”

Intussen wonder ons almal stilweg waar ons die instruksieboekie verloor het.

Neem nou die kruidenierswinkel. Ek gaan in vir brood en melk. Tien minute later staan ek by die rak met koekies, koeldrank, twee spesiale aanbiedinge en iets wat ek glad nie nodig gehad het nie. Maar omdat dit afgemerk is, voel dit soos ’n finansiële oorwinning.

En hoekom raak slaap skielik ’n luukse item soos mens ouer word? Toe ek jonger was, wou niemand my laat laat slaap nie. Nou kan ek slaap tot wanneer ek wil, maar my liggaam besluit vieruur die oggend is die perfekte tyd om wakker te word en aan verleenthede van tien jaar terug te dink.

Dan is daar natuurlik die tegnologie. Elke keer as ek uiteindelik verstaan hoe iets werk, stel hulle ’n nuwe weergawe vry. Net as ek voel ek is op datum, herinner my selfoon my dat ek eintlik drie opdaterings agter is.

Maar dalk is dit die geheim van die lewe. Niemand het al daarin geslaag om alles uit te pluis nie. Ons probeer net ons bes, lag oor ons foute en maak soms asof ons weet wat aangaan totdat ons dit regkry.  

Dan vang ek myself ook soms waar ek tussen die rakke staan en met myself redeneer.

“Het jy regtig nog sjokolade nodig?” vra ek hardop, net om myself te antwoord: “Nodig? Nee. Verdien? Absoluut.” 

Dis eers wanneer iemand my vreemd aankyk dat ek besef hierdie gesprek was toe nie so privaat soos ek gedink het nie. Dan glimlag ek net ongemaklik en stap vinnig aan, asof ek besig was met ’n baie belangrike vergadering.

En as jy vandag voel jy het nie al die antwoorde nie, moenie bekommerd wees nie. Die res van ons is in dieselfde bootjie. Sommige van ons roei selfs met die verkeerde kant van die roeispaan. 

– [email protected]

* Beste lesers, keuring vir die ­publikasie van WhatsApp, briewe en alle ander lesers­bydraes berus by Republikein. Klagtes oor die diens van ­private besighede word eers aan die onder­neming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.