Die heldin agter die skerms

Ek het eenmaal iets gelees oor mans wat ver gekom het, in vername poste aangestel is en wat baie in hulle lewens bereik het. Amper sonder uitsondering het hierdie mans vrouens in hulle lewens gehad wat by die huis na als omgesien het. Heldinne wat nie die prestasies op hul naam het nie, maar wat die prestasies moontlik help maak het. Die kinders grootgemaak het wanneer hulle maat op werksreise was ensovoorts. Daardie balans is stadig maar seker besig om te verander namate die jonger generasies ouer word. Die vrouens werk ook deesdae en iemand moet in die tussentyd daardie gaping vol staan. Oor minder as twee weke word Lisa ’n jaar oud. As haar ouers is ek en my man so bly oor hierdie vooruitsig en ek is van plan om iewers weer meer in detail hieroor te skryf. Maar vir vandag wil ek skryf oor die vrou wat hierdie jaar na Lisa gekyk het. Dit was nie ek nie, ek was net op bystand. Rondom Maart hierdie jaar is my pa na sy kuier hier by ons weg met die woorde: “My kind, jy sal ’n plan moet maak – jy sal nie so kan aangaan nie.” En hy was reg. Daar was werksdruk en ek het terselfdertyd na my kind probeer omsien, wat baie maal laat nagte opgelewer het. Ons huishulp is ’n liewe vrou wat al ’n keer of twee na ons seun omgesien het wanneer hy siek by die huis is en ons werksdruk het wanneer ons nie by hom kon tuis wees nie. Ek het haar daar en dan gevra om meer dae per week te begin werk. Maandae tot Vrydae, 8:00 tot 13:00 en sy is self ’n ma van twee seuns. Sy het ’n huishouding wat sy elders ook aan die gang moet hou en haar eie gesondheidsprobleme. Hierdie vrou het die uitdaging wat ons aan haar gestel het vierkantig aanvaar en vir die eerstehulpkursus gegaan waarheen ons haar gestuur het vir basiese opleiding. ’n Kursus wat ek en my man self gaan doen het net voor Lisa gebore is. Wanneer ons meisiekind slaap, gebruik sy die babamonitor om die wasgoed te gaan ophang en was vir die meeste dae Maandag tot Vrydag beskikbaar om na ons meisiekind om te sien. Wanneer “Poppie” net boe of ba is sy daar om te gesels, te lag en soms saam met haar te sing. Ek hoor dit alles van my kantoor af, ’n klipgooi weg op die werf. Op die dae wanneer my man van die huis af werk, het hy haar gevra om tot 17:00 te werk, teen ekstra vergoeding. Sy het die reëling aanvaar en was beskikbaar, ten minste een maal per week, selfs soms twee of drie maal per week. Maar ons het dit met haar vooraf gereël. Volgende jaar lyk hierdie gawe, saggeaarde vrou se inkomstestruktuur en werksdae anders, omdat ons vir Lisa skooltjie toe stuur en ek weer voltyds van die kantoor af gaan werk. En ja, ek is besig om te vra of iemand dalk weet van werk vir Lisa se ‘tannie’.Ek glo dat sy ten minste vir twee dae in die week beskikbaar sou wees, maar as sy ’n beter aanbod iewers anders sou kry by ’n liewe vriendelike huishouding wat vir ’n verlengde tydperk, verkieslik langer as net ’n jaar, voltyds vir haar sou kon werk aanbied, sal ons nie graag in haar pad wil staan nie. Gesels gerus met my per e-pos indien iemand weet van ander geleenthede. Vir diegene wat reeds so ’n iemand in hulle lewens het, ek hoop julle kan julle persoon agter die skerms geniet en waardeer, want sonder hulle sou baie dinge nie moontlik wees nie. – Gasskrywer– lane.lwenhold@gmail.com

Die heldin agter die skerms

Kommentaar

Republikein 2026-11-11

Meld asseblief aan om kommentaar te lewer

Die heldin agter die skerms

Kommentaar

Republikein 2026-11-11

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.