Die gaping tussen vertaling en begrip

Onlangs het ek op die internet ’n Bybelvers gevind wat baie gepas is vir ons gesin. Let wel, op die internet, nie in die Bybel nie.Nadat ek ’n bietjie rondgesoek het, het ek gevind daar is nie ’n vergelykbare Afrikaanse vertaling vir dié spesifieke vers beskikbaar nie. Dit kom uit die New Century Version (NCV) wat in 1987 vertaal is – die idee van dié spesifieke Bybel is die konsepte word eenvoudig vertaal – idee vir idee en nie woord vir woord nie. Die vers lui as volg: “In the same way I will not cause pain without allowing something new to be born,” says the Lord. “If I cause you the pain, I will not stop you from giving birth to your new nation,” says your God.Die persoon wat die vers-uittreksel geneem het – het die vers as volg ten toon gestel: “I will not cause pain without allowing something new to be born.”Nou alleen daarin het ’n paar woorde van die vers weggeval; dit het meer universele betekenis gekry, maar die oorsprong van die vers is redelik verdoesel. Die vers kom voor in Jesaja 66:9 en enige Afrikaanse vertaling sal vir jou die tegniese aspekte van die natuurlike geboorteproses uiteensit. Wat ek hierin interessant vind, is dat Bybelvertalings wat in sekere opsigte getrou bly aan die individuele woorde, die verstaanbaarheid van die teks heeltemal laat verlore gaan.En dan, weer in die vertalings self, waar mense betrokke raak om die konsepte weer te gee, kan hulle nie help om deur hul eie menslikheid maar wel ’n paar bedenklike oordele te gebruik wanneer hulle die tekste vertaal nie. Nietemin, hierdie is geensins verskonings om minder van die Bybel as ’n boek te hou nie. Die internet is deesdae die snelweg wat ons vinniger as ooit te vore van punt A (in die konteks van ’n gedagte of ’n Bybelvers) na punt B kan vat. En dit is ook waarvoor ons dit moet gebruik. Die Bybel se woordgetroue vertalings is die pogings van mense om so na as moontlik in die taal wat jy self verstaan, vir jou te sê wat God en Jesus self gesê het al daardie jare gelede. En daarvoor moet ons die Bybel gebruik. Nie oorkruis, die een vir die ander doel nie. Die konsepgebaseerde Bybels probeer die inhoud oordra deur eenvoudiger woorde te gebruik. Soms val daar in die proses ’n bietjie pap op die grond, maar dink julle nie dit was vir Jesus belangriker dat ons die idee begryp, eerder as wat ons die hoogdrawende woorde uit ons koppe leer nie? Veral in die lig gesien van Sy groot liefde vir die Fariseërs. Die liefde vir God se woord – is ’n studie, nie ’n Instagram-foto wat alles met een greep sê nie. En wanneer ons opsoek, dan lees ons op in verskillende vertalings om sin te probeer maak van dit wat ons so pas (in my geval op die internet ) gelees het – tien teen een op Instagram. In die geval van my spesifieke Bybelvers word die metafoor van kindergeboorte gebruik om uit te beeld dat daar pyn en lyding sal wees, maar dat iets positiefs, iets nuuts daarop sal volg. Daar sal pyn en lyding in die lewe wees, maar dit sal iets positiefs, iets nuuts tot gevolg hê. Vir enige man of kind wat nie die geboorteproses verstaan nie, of selfs vir ’n vrou wat nog nie natuurlike geboorte beleef het nie (kom ons skat 80% van die hedendaagse bevolking), mag die tradisionele vertalings ongelukkig min betekenis inhou.En dit is waar dit vir my jammer is. Want ek glo dit was Jesus se hele bediening – dat die Bybel vir meer mense as net die skrifgeleerdes verstaanbaar moet word en hulle daarin moet begin belangstel. Is hierdie ’n versoek vir ’n “makliker” Afrikaanse Bybelvertaling? Ek weet nie, want baie Afrikaanssprekendes wend hulle tot makliker Engelse vertalings en vind dit nuttig.Ek reken dit gaan vir my daaroor dat die boodskap wat die Bybel probeer oordra, verstaanbaar gemaak moet word, want ek is ongelukkig daarvan oortuig diegene wat die ouer Afrikaanse vertalings uit hul koppe geleer het, nie noodwendig altyd weet hoe om dit prakties in hul eie lewens toe te pas nie.Oukei, genoeg vir vandag. Alle akademiese gedagtes opsy. Die internet is die internet en die Bybel is die Bybel. En God sal jou nie pyn laat verduur sonder dat iets moois, iets nuuts, iets lewensvatbaar daaruit kom nie. Met liefde, van Wiesie.* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Die gaping tussen vertaling en begrip

Kommentaar

Republikein 2026-10-28

Meld asseblief aan om kommentaar te lewer

Die gaping tussen vertaling en begrip

Kommentaar

Republikein 2026-10-28

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.