Bybelse wysheid

DR. ANNES NEL

Psalms 3:4: “Maar U, Here, is ’n skild wat my beskut.”



Moeilikhede kom in baie vorme na ons toe. Soms is dit siekte of dood. Ander kere is dit onsekerheid oor die toekoms weens werksomstandighede. Dikwels is dit selfs ons eie skuld, wanneer ons swak oordeel ’n bepaalde situasie veroorsaak het.

Dawid het hom ook in só ’n krisis bevind. Hierdie keer was dit sy eie seun wat in opstand teen hom gekom het. Die Psalm wemel van oorlogstaal. Die Here is vir Dawid soos ’n skild (3:4). Hy skenk hom die oorwinning (3:8). Geen mag kan hom van God se sorg skei nie (3:7-8). Daarom slaap Dawid rustig en word hy vol moed wakker (3:6).

Probleme het die vermoë om ons van God af weg te trek en ons lewens te kelder. Dit ontwrig nie net ons slaap nie, maar dikwels ook ons hele bestaan. Ons begin dan ons eie planne maak. Tog daag die psalmis ons uit om God te vertrou. Hy sal help soos Hy nog altyd gehelp het.

In ’n gesprek met Niels Bohr het die wetenskaplike Albert Einstein gesê dat dit moeilik is om God se kaarte te sien. Maar dat God sou dobbel met die wêreld – dít, het Einstein gesê, kan hy vir geen oomblik glo nie. Ek dink Einstein het Psalm 3 verstaan.



Here God, dankie dat U my nooit vergeet nie, maar my in die moeilikste tye beskerm. Amen.