Bybelse wysheid

DR. ANNES NEL

Efesiërs 6:4: “En vaders, moenie julle kinders so behandel dat hulle opstandig word nie, maar maak hulle groot met tug en vermaning soos die Here dit wil.”



Ouerskap is ’n goddelike roeping. Paulus moedig kinders aan om hulle ouers te gehoorsaam. Hy spoor pa’s ook aan om regverdig te wees. Pa’s moet hulle kinders grootmaak “met tug en vermaning soos die Here dit wil”, eerder as met persoonlike reëls. Wanneer ons bewus is van ons eie foute, stel dit ons in staat om nie oorkrities te wees nie. As draers van God se genade is dit ons verantwoordelikheid om sy liefde en genade te weerspieël in alles wat ons doen. Dit maak dit vir ons kinders makliker om God se gebooie te gehoorsaam.

Oscar Wilde het gesê “die beste manier om kinders groot te maak, is om hulle gelukkig te maak”. Hierdie raad het beide meriete en slaggate. Aan die een kant is dit misleidend as ouers vriendskap bo leiding prioritiseer. Soms bring dit dan ons waardes en verhouding met God in gedrang ter wille van ons kinders se geluk. Aan die ander kant is Wilde korrek. Ons kan ons kinders inderdaad gelukkig maak wanneer hulle sien dat ons ons verhouding met God prioritiseer.

Daar sal tye wees wanneer ons besluite ons ongewild maak. Wanneer hulle egter sien hoe ons die Here eer deur ons rol ten volle te omhels en ons gesinslewe op God se waarheid te bou, kan ons ons kinders na ware vreugde lei.



Here, maak ons godvrugtige ouers. Amen.