Bybelse wysheid

DR. ANNES NEL

Hosea 4:1-2: “Omdat trou, liefde en toewyding aan die wil van God in die land ontbreek, het vervloeking, valsheid, moord, diefstal en egbreuk hand oor hand toegeneem en is die vergieting van onskuldige bloed aan die orde van die dag.”



Wanneer liefde vir God vervaag, kwyn respek. Hosea 4 illustreer hierdie verband. Hosea verwys na die misleiding deur profete en priesters. Daarom het liefde vir die Here skaars geraak. Trou, liefde en toewyding aan God herinner ons aan die verwaarloosde verbond tussen God en sy mense, wat swak verhoudings veroorsaak. Vyf van die Tien Gebooie word genoem: vloek, valsheid, moord, diefstal en owerspel. Hosea beskryf selfs die ekologiese gevolge van sonde en sê dat die land en diere sal ly (4:2).

Daar kan kwalik ’n meer direkte boodskap vir vandag wees. Wanneer ’n samelewing of individu God vergeet, ly alles. Dan hou ons op om vir mekaar en vir morele waardes om te gee.

Die enigste manier waarop gesinne herbou sal word, moraliteit herstel, bedrog en diefstal aan bande gelê sal word en liefde vir mekaar weer aangevuur sal word is as ons almal terugkeer na God en sy wil vir ons lewens aanvaar.

Wanneer ons God eer, Hom dien, sy naam verheerlik en sy dag daaraan wy om ons lewens te verdiep deur sy Woord te bestudeer, gemeenskap te beoefen, te rus van ons daaglikse roetines, om te gee vir die armes en aandag aan ons gesinne te gee, demonstreer ons ons liefde vir God.