Bybelse wysheid

DR. ANNES NEL

Luk 15:32: “Maar ons kan tog nie anders as om fees te vier en bly te wees nie, want hierdie broer van jou was dood, en hy lewe weer; hy was verlore, en ons het hom teruggekry.”



Die gelykenis van die verlore seun is ’n onvoltooide verhaal. Soos die verhaal van Jona, weet ons nie wat die uiteinde was nie. Het die ouer broer saam partytjie gehou, of het hy buite gebly? Het Jona se hart sag geword en God se medelye gedeel?

Ons moet hierdie verhaal klaarmaak. Gaan ons bly wees soos die pa wat sy verlore seun terug verwelkom het? Gaan ons God se besorgdheid oor die wêreld deel? Of bly ons soos Jona en die ouer broer wat nie God se hart van omgee deel nie?

Ons verlorenheid is om buite te bly omdat ons nie God se hart vir ons begryp nie.

Henri Nouwen skryf dat dit moeilik is om ander te vergewe omdat ons nie ons eie vergifnis ten volle aanvaar het nie. Aan die einde van die verhaal staan die Here buite by die oudste seun en nooi hom – en ons – om in te kom.

“My seun, my dogter, kom deel in my vreugde.” Dan sal daar vreugde in die hemel wees, want ons is ook gevind.



Here God, laat my ingaan en deel in U vreugde. Amen.