Bybelse wysheid

DR. ANNES NELJesaja 40:1: “Troos, troos my volk, sê julle God!” (1953-vertaling)Die meeste mense weet niks van ballingskap, om ’n vlugteling of asielsoeker te wees nie. Miljoene mense het nie skuiling nie. Miljoene mense is vlugtelinge. Miljoene mense het hoop verloor. Hulle lewens is deur geweld vernietig. Geestelike depressie en mishandeling is die lot van duisende, of dalk miljoene.Die profeet praat met mense in ballingskap. Jesaja 40-55 is die sogenaamde troosboek. ’n Mens kan sê dat die woord “troos” die leuse of slagspreuk van hierdie deel van die boek is. Die Hebreeuse woord beteken meer as medelye of troos. Dit beteken die einde van swaarkry. Dit beteken herstel. Dit is hoe Handel se Messias begin. . . Comfort ye!God gee vertroosting. Hy sê dat hulle sondes vergewe is (40:2). Daar sal geen struikelblokke meer op hulle pad wees wanneer die Here hulle uit ballingskap sal terug lei nie (40:3-5). Die Here is soos ’n herder wat sy volk deur moeilike tye sal lei (40:11). Mense kan nie hoop gee nie (40:6-8), maar God se woord is seker en vol belofte (40:8).God se vertroosting hou nie op nie. Vandag kan jy weet: God se woord is ewig en sy beloftes staan vas – al verander alles. In Christus is al hierdie beloftes vervul. Ons is getroos! In Christus is God Immanuel, God met ons, in alle omstandighede.Here, God van genade en vertroosting, dankie dat U my vandag vertroos het. Amen.

Bybelse wysheid

Kommentaar

Republikein 2025-05-01

Meld asseblief aan om kommentaar te lewer

Bybelse wysheid

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie