Bybelse wysheid

DR. ANNES NEL

2 Konings 6:23: “Die koning van Israel het vir hulle ’n groot feesmaal gegee. Nadat hulle geëet het, het hy hulle laat gaan, terug na hulle koning toe.”

Die soldate van Aram het gekom om Elisa gevange te neem. Toe Israel die geleentheid kry om hulle dood te maak, kies Elisa egter ’n ander pad.

Die koning van Israel vra of hy die soldate moet doodmaak. Elisa sê nee. Hy sê vir hom om vir hulle kos en water te gee. Nadat hulle geëet het, word hulle teruggestuur na hulle koning toe. Dis genade. Die soldate het gekom om dood te maak, maar hulle word nie met wraak behandel nie.

Genade beteken nie dat ons maak asof die verkeerde dinge nie gebeur het nie. Dit beteken dat ons kies om goed te doen, selfs wanneer ons die reg het om kwaad te wees. Dit beteken om nie wraak te neem nie. Wanneer mense ons seermaak, is ons eerste reaksie dikwels om kwaad te word, terug te baklei of wraak te neem. God roep ons om anders te leef. Hy leer ons om te vergewe, goedhartigheid te wys en die oordeel aan Hom oor te laat.

Ons kan genade aan ander bewys omdat God eerste genade aan ons bewys het. Ons het Sy liefde en vergifnis ontvang, nie omdat ons dit verdien het nie, maar omdat Hy goed is.

Here, help my om ander te behandel met dieselfde liefde en genade wat U aan my bewys. Amen.