Bybelse wysheid

DR. ANNES NEL

2 Konings 2:14: “Hy het die mantel wat van Elia afgeval het, gevat en daarmee op die water geslaan. Hy vra toe: ‘Waar is die Here, die God van Elia?’ Hy het weer op die water geslaan, en die water het verdeel. Elisa het deurgegaan.”

Elisa het pas gesien hoe Elia in ’n stormwind hemel toe geneem word. Die verhaal het nie daar geëindig nie. Elisa het steeds ’n roeping gehad om te vervul. Hy het Elia se mantel opgetel, teruggegaan na die Jordaan en die toekoms in geloof aangepak.

Min profete was so betrokke by die lewe van gewone mense soos Elisa. Hy het mense gehelp wat honger en siek was en wat ’n geliefde aan die dood afgestaan het.

Soms gee God vir ons besondere oomblikke wanneer ons sy teenwoordigheid baie sterk ervaar. Sulke oomblikke versterk ons geloof. Hy stuur ons egter terug na ons gewone lewe om Hom en ander mense te dien.

Die Heilige Gees stel ons in staat om getrou te bly, selfs wanneer alles doodgewoon lyk. Ons kan iemand wat treur vertroos, omgee vir iemand wat eensaam voel, saam met ’n siek persoon bid, iemand wat moedeloos is te bemoedig, of die evangelie met liefde deel.

God werk steeds deur gewone gelowiges soos ons. Spesiale ervarings is wonderlik. Nou kan ons dit met vertroue agterlaat. Ons weet dat die God van Elia en Elisa deur sy Gees by ons is.

Here, help my om U te dien waarheen U my ook al lei. Amen.