Bybelse wysheid

DR. ANNES NEL

2 Konings 2:14: “Waar is die Here, die God van Elia? Waar is Hy?”

Daar is oomblikke wanneer ons baie naby aan God voel. Ons word skielik bewus van sy teenwoordigheid. Dit kan tydens aanbidding of gebed of in ’n moeilike tyd wees. Sulke oomblikke is kosbaar, maar dit is nie die volle prentjie van die Christelike lewe nie. Elisa het gesien hoe God deur Elia gewerk het. Nou is Elia weg. Hy moes leer dat die God wat deur Elia gewerk het, steeds by hom was.

Wanneer dinge verander of wanneer God ver voel, vra ons maklik: “Is God nog by my?” Die antwoord is ja. God het Homself volkome deur Jesus bekend gemaak. Al was die verheerliking, waartydens Moses en Elia saam met Jesus verskyn het, spesiaal, het God gesê: “Dit is my geliefde Seun oor wie Ek My verheug. Luister na Hom.”

Ons kan nie vir altyd op die berg bly nie. Die besondere oomblikke met God gee ons nuwe moed, maar daarna moet ons teruggaan na ons gewone lewe. Daar wag werk, verantwoordelikhede, probleme en onsekerheid. Die vraag is nie of ons die bergervaring kan behou nie, maar of ons Jesus sal bly volg wanneer ons van die berg afkom. Hy is by ons in die gewone dae (Matt. 28:20). Kom ons stap agter Hom aan, luister na sy stem en vertrou Hom, selfs wanneer ons nie sterk voel nie.

Here Jesus, help my om U elke dag getrou te volg. Amen.